Siglir tar il cuntegn

La Paloma In hit da las gratulaziuns

Cul hit sidamerican «La Paloma» ha il chor maschadà Rueun-Siat preschentà il 2005 ina chanzun che vegn anc oz gugent giavischada durant las gratulaziuns.

Adina puspè pon ins durant las gratulaziuns tadlar «La Paloma» dal chor maschadà Rueun-Siat. Quai pitschen hit da las gratulaziuns ha Gion Tschuor scrit aposta per chor maschadà. Il 2005 ha el tschertgà ina chanzun per il Raiffeisen Festival da chors. A l’entschatta ha el gì en egl pliras chanzuns rumantschas sco per exempel era in’atgna versiun da «Il schnec da Medel».

La finala è Gion Tschuor, ch’è dapi 30 onns dirigent dal chor maschadà Rueun-Siat, sa decidi per «La Paloma». Ina chanzun che deriva dal 19avel tschientaner dal cumponist spagnol Sebastián de Yradier. Ella raquinta d’encreschadetgna e da la mar. Gest quell’encreschadetgna saja in punct che collia ils rumantschs cun quella chanzun.

La tematica da la mar ha il dirigent anc ina giada prendì si a la fin da la chanzun nua ch’ins auda undas e muettas. Quella spezialitad saja naschì dals giavischs ch’il festival haja dà avant. Uschia ha mintga preschentaziun gì da cuntegnair suns supplementars e moviment.

Artitgels legids il pli savens