Per clamar en memoria la musica da Goff Richards datti in'emissiun speziala cun sias melodias. Il cumponist englais, da Cornwall, ha scrit blera musica da divertiment ed era musica da concurrenza. Ses stil è per gronda part popular cun melodias che van spert en chau ed ureglias, dentant tuttina pretensius. En spezial sias ovras per Brass Band han purtà ad el ina reputaziun internaziunala ed i na dat strusch ina band che n'ha anc mai sunà in'ovra d'el.
Jau emprov da scriver musica che vegn chapida da la pli blera glieud – musica che sunadurs vulan sunar e ch'il public vul adina puspè tadlar. Quai n'è betg adina simpel, ma sche quai ma grategia en ils pli blers cas, sun jau ventiraivel.
Vita e musica
Naschì è Goff Richards ils 18 d'avust 1944 sco Godfrey Richards. Dal 1962 fin il 1965 ha el studegià al Royal College of Music, ed è daventà pedagog da musica diplomà. El ha lavurà ditg sco docent a diversas scolas da musica e davent il 1981 è el stà activ sco dirigent, cumponist ed arranschader. Tranter il 1976 ed il 1989 ha el fatg prelecziuns en arranschar al Salford College of Technology (oz University College Salford). Latiers ha el era dirigì il College Jazz Orchestra. El è era vegnì onurà pliras giadas per sia lavur.
Or da sia plima èn ovras concertantas sco per exempel «Doyen», «A Saddleworth Festival Ouvertur» u era «Oceans». Populars èn «Calling Cornwall» u «Confection for Brass». L'Instrumentala fa omagi al cumponist ch'è mort memia baud il 2011 cun be 66 onns.
![](https://il.srgssr.ch/images/?imageUrl=https%3A%2F%2Fdownload-media.srf.ch%2Fworld%2Fimage%2Faudio%2F2020%2F07%2Fa195f0ed034d4e6880b61747d183f283.jpg&format=jpg&width=320)
L’emissiun preschenta furmaziuns da brass, armonias, fanfaras, musicas militaras, furmaziuns pitschnas ed auter pli.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.