Il plaschair da puspè pudair sunar live è fitg grond era sch'inqual ha mo sunà paucs concerts.
Nova musica rumantscha
URSINA ha publitgà ses album «when i let go» la fin avrigl. Ella ha gia puspè gust da scriver novas chanzuns. L'atun datti singuls concerts dad URSINA en locals pli pitschens. Aurelius e Sirius han publitgà lur album «#FlimsLaaxStaderas» il mars. Ussa èn els vid chattar e metter ensemen termins per concerts. Bibi Vaplan è gia in mument occupada cun ses project, la «Popcorn-Opera», en quest connex è ella vid planisar e realisar ils proxims pass. L'auter onn datti era intgins concerts dad ella. Cun ses Songbook «Arva la mar» ch'el ha publitgà il matg è Pascal Gamboni gia in mument sin tournea. Prefix han danovamain stuì stuschar la festa per lur disc «Oriund» ch'els han publitgà la fin da l'onn passà.
Stuschà u midà plans
Las musicistas Chiara, Da Lombris e Martina Linn han ord differentas raschuns stuschà lur registraziuns u albums sin l'onn proxim. Benedetto Vigne lavura en il studio vid ses album «melodias da mes tat», che cumpara dentant era pir l'auter onn. Dario Hess e ses Spanky Hammers han midà lur plans. Enstagl da publitgar in'album preschentan els mintga pèr mais ina single. L'emprima cun il num «Calanda» è cumparida l'entschatta settember. Nova musica dad in project pli lung datti proximamain d'udir da Tumasch è . El publitgescha ina stgatla cun quatter schibettas che sa numna «melodias ord differents territoris»
