Sias chanzuns èn classichers da la musica da pop. Cun hits sco «Daddy Cool», «Rasputin» ubain «Rivers of Babylon» ha el purschì la musica per ina entira generaziun.
Frank Farian è naschì l'onn 1941 en Germania. Atgnamain lavurava el sco cuschinier, aveva dentant gia bain in pitschen studio sin il palantschin. Sia emprima platta sco chantadur ha el edì gia ils onns 60.
Boney M. e Milli Vanilli
Dapi la mesadad dals onns 70 era el dentant producent da musica. Tranter auter ha el fundà las gruppas da musica Boney M. e Milli Vanilli. El ha er chantà per las duas bands, dentant mo en il studio. L'entschatta dals onns 90 è vegnì enconuschent, ch'ils dus commembers da Milli Vanilli n'han gnanc sez chantà.
Producziuns da Frank Farian èn vegnidas vendidas sin l'entir mund passa 800 milliuns giadas. El possedeva studios da tun a Brüssel, Miami ed Ibiza.