Quatter musicas instrumentalas: Ils «Ulrichsbläser Büchlberg», la «Möckenlohe Brass Band», il «Jugendblasorchester Marktobersdorf» e la «Brass Band Unterallgäu» ensemen cun il «Bayrisches Radiosinfonie Orchester» – en tut bunamain 300 musicantas e musicants – èn sa participads ad in project extraordinari dal «Bayrischer Rundfunk»: In «Symphonischer Hoagascht». Il pled «Hoagascht» deriva dal tudestg medieval «Heingarte» – (Heimgarten) e munta nagut auter ch’ina saira cun diversas furmaziuns da musica che sa preschentan.
L'idea per il project ha gì il dirigent Simon Rattle ch'è dapi curt il schefdirigent dal «Bayrisches Radiosinfonieorchester». Cunquai che la Germania ed en spezial era la Baviera ha ina gronda tradiziun da musica instrumentala ha Rattle vulì far ina cumbinaziun cun musica instrumentala ed in orchester sinfonic. A posta per quest project ha il «Bayrischer Rundfunk» incumbensà il cumponist Lorenz Dangel da scriver in'ovra per quatter musicas instrumentalas ed in orchester sinfonic. Dangel n'enconuscheva betg la scena da musica instrumentala ed ha perquai visità las quatter furmaziuns per tadlar ellas e per discurrer cun musicantas e musicants. Pir suenter ha el pudì cumenzar a scriver l'ovra «PHON». Quella sa cumpona da 10 parts e mussa ils divers aspects da la musica instrumentala.
In'ulteriura ovra maiestusa che las tschintg furmaziuns han preschentà è la «Grande Symphonie funèbre et triomphante» da Héctor Berlioz. Igl è l'ultima sinfonia dal cumponist franzos ed ina da las emprimas scrittas per ina musica militara. Berlioz sez ha dirigì il fanadur 1840 la primaudiziun da ses opus 15.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.