Otto Barblan è naschì ils 22 da mars 1860 a S-chanf sco figl da Florian e Mengia (nata Pitsch). Ses bab era magister, organist e dirigent e ses tat Otto e ses barba Domenic eran spirituals en divers lieus en l'Engiadina.
Temp da studi
Il 1874 ha el frequentà il seminari da magisters a Cuira. Là ha el giudì instrucziun da clavazin tar Hans Grisch, in scolar da Mendelssohn. Suenter avair terminà il seminari cun success è Otto Barblan sa decidì da deditgar sia vita a la musica. Dal 1878 fin il 1884 ha el studegià orgla e cumposiziun al conservatori da Stuttgart. En quest temp è el er s'occupà fermamain cun la musica da Richard Wagner e Johannes Brahms.
Suenter il conservatori
Gia sco student ha el fatg viadis da concert tras la Svizra ed ils pajas vischins. Suenter ses examen è el daventà magister per clavazin ed orgla al conservatori da Stuttgart. Il 1885 ha el bandunà Stuttgart per daventar scolast da musica a la scola chantunala grischuna a Cuira. En sia autobiografia ha el scrit pli tard, ch'el n'haja betg pudì resister al clom da la patria da surpigliar quest post. A Cuira è el er s'engaschà sco dirigent dal Chor maschadà Cuira e dal Chor viril Cuira. En quest temp ha el er scrit sias emprimas cumposiziuns impurtantas.
Genevra – center da vita
Il 1887 han ins offrì ad Otto Barblan il post d'organist da la catedrala Saint-Pierre a Genevra. L'emprim ha el targlinà perquai ch'el na vuleva betg bandunar la patria suenter in temp uschè curt. La finala ha ina delegaziun da Genevra pudì persvader el ed el ha surpiglià il post. Gia il 1888 ha el survegnì ina plazza sco magister per cumposiziun ed orgla al conservatori a Genevra. Il medem onn il settember ha el er maridà Frida Lantzer. Els avevan dus uffants, la figlia Edwig ed il figl Florian.
Il 1892 è el vegnì dirigent da la Société de Chant Sacré, dal 1889 fin il 1900 ha el dirigì il cerchel da chant Genevra e dapi il 1901 il Petit Choeur ed il chor dal dom Saint-Pierre.
Fin l'onn 1938 ha el ademplì ses uffizis cun gronda conscienziusadad ed inschign. Entras sia lavur engaschada per sia classa d'orgla è el daventà in magister tschertgà per organists en l'entira Europa ed ils Stadis Unids. Passa in mez tschientaner ha Barblan marcà la vita musicala da Genevra, tranter auter ha el promovì activamain l'ovra da Johann Sebastian Bach. El è burgais d'onur da Genevra, e l'Universitad da Genevra ha dà ad el il titel da docter honoris causa.
El è era confundatur dal «Schweizerischer Tonkünstlerverein». Il 1937 è el vegnì commember d'honur da l'uniun ch'è dapi il 2017 fusiunada a «SONART» ensemen cun autras associaziuns da musica.
1942 – cun 82 onns è Otto Barblan sa retratg sco organist da la catedrala Saint-Pierre a Genevra. Ses ultim giavisch da pudair far in davos viadi en sia patria pli stretga – l'Engiadina n'è betg ì en vigur. Ils 19 da december 1943 mora el a Genevra.
Ovra
Malgrà ses divers uffizis èsi gartegià a Barblan da stgaffir in'ovra da cumposiziun voluminusa e da gronda valur, en spezial en la sparta musica d'orgla e musica da chors (spezialmain sacrala). Da gronda muntada è era sia «Lukas-Passion» dal 1916.
Enconuschent è sia «Calvenfeier», in gieu festiv en quatter parts ed in act festiv per soli, chor ed orchester che regorda a la battaglia da la Chalavaina dal 1499 ed a l'adesiun dal chantun Grischun a la Republica helvetica il 1798. Pir bun in onn avant la premiera (28 da matg 1899 a Cuira) ha Otto Barblan survegnì l'incumbensa da scriver la musica per il gieu festiv. Il text è dals dus redacturs grischuns tar la gasetta «Der Bund», Michael Bühler da Tenna e Georg Luck da St. Antönien.
Da sias numerusas cumposiziuns per orgla èsi da numnar la «Passacaglia» opus 6, la «Chaconne» sur B-A-C-H (opus 10) e sias variaziuns da concert davart B-A-C-H (opus 24). Per la chasa editura Edition Peters ha el dà ora l'ovra d'orgla da César Franck. Las ovras da Barblan èn cumpositoricamain spessas ed han in'armonica colurusa.
Oz èsi vegnì quiet enturn la musica da Otto Barblan. Sia «Vaterlands-Hymne» ord la «Calvenfeier» n'è per pauc betg daventà l'imni naziunal svizzer, vegn però anc magari sunà e chantà. Pli darar d'udir èn da sias cumposiziuns en concerts d'orgla.
Otto Barblan en emissiuns da RTR:
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.