Cumenzà ha tut cun Hanny Christen. Ella ha vivì dal 1899 fin dal 1976 ed ha ramassa in grond stgazi da musica populara, sauts che fissan forsa ids a perder. A partir dal 1940 aveva ella notà millis da melodias ed il 1963 ha ella surdà sia collecziun a la biblioteca da l’universitad da Basilea – e là resta quella durant 30 onns.
Il 1992 chatta il musicant e cumponist Fabian Müller per cas il relasch da Hanny Christen. Ils 12'000 sauts vegnan sortids, cataloghisads – ed il 2002 vegn publitgada la collecziun da la chasa editura Mülirad.
Nova vita per sauts emblidads
Suenter la publicaziun datti grond interess da chapellas e furmaziuns che cumenzan a sunar quests sauts. La pli impurtanta è però la Hanneli-Musig, fundada il 2002 aposta per far reviver las melodias veglias. Ils musicants da vaglia Dani Häusler, Fränggi Gehrig (fin il 2008 Markus Flückiger), Ueli Mooser, Peter Gisler (fin il 2018 Christoph Mächler), Fabian Müller e Johannes Schmid-Kunz han registrà 8 discs cun sauts da tut la Svizra, han fatg tschients concerts ed han procurà ch’ils sauts da la collecziun da Hanny Christen na restan be en ils truclets. Ina schelta da quels han els preschentà a Rudolstadt, al 30avel Festival da folk da la EBU e quest concert udis questa dumengia a las 14.00 tar RTR.
Rudolstadt e la Hanneli-Musig
-
Bild 1 von 5Legenda: In grond public al festival a Rudolstadt MAD
-
Bild 2 von 5Legenda: La Hanneli-Musig Da sanestra: Peter Gisler, Dani Häusler, Ueli Mooser, Fabian Müller, Fränggi Gehrig e Johannes Schmid-Kunz MAD
-
Bild 3 von 5Legenda: Ina chapella da vaglia: la Hanneli-Musig MAD
-
Bild 4 von 5Legenda: La Hanneli-Musig il 2018 en la baselgia da Sent RTR / Jachen Prevost
-
Bild 5 von 5Legenda: La Hanneli-Musig il 2022 a San Niclà RTR / jachen Prevost
La segunda ura dal Artg musical
Durant la segunda part da l'emissiun preschentain nus dus dals 130 concerts dal 30avel Festival da folk da la EBU. Quel è sta en il rom dal festival da Rudolstadt, il pli grond da ses gener cun in vast program da musica populara e da folk da tut ils continents.
Gruberich da la Bavaria
Ina furmaziun che sa producir maletgs ed atmosferas che mainan nus sin las alps, sut in tschiel plain stailas e schizunt sut aua, cun blera poesia e fantasia – cun tuns loms e subtils e lura er selvadis ed innovativs. Las duas musicistas Maria Freidrich e Sabine Gruber-Heberlein vegnan da la musica classica, èn engaschadas en divers orchesters bavarais – e Thomas Gruber ha sias ragischs en la musica populara, s’interessa per musica veglia e tut ils tuns pussibels ch’el integrescha en sias cumposiziuns.
Fara da la Scozia
In quartet che vegn da las inslas selvadias dad Orkney, pauc populadas, impressiunantas e cun bleras tradiziuns. Quella musicala tgiran Fara cun Catriona Price, violina e chant, Jeana Leslie e Silly Simpson violina – e Andrew Dunlop, piano. Lur carriera ha cumenza cun in concert persvadent il 2014 tar il Orkney Folk Festival – e dapi là èn ellas stadas en gir sin tut il mund e tar blers festivals impurtants, uschia er la stad passada a Rudolstadt.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.