Il Rain
Il Grischun enconuscha ils dus flums Rain Anteriur e Rain Posteriur che sauneschan a Rehanau per ir communablamain vinavant sco «Rain». «Noss» flum grischun fa in viadi da passa 1'200 km fin ch'el arriva en la Mar dal Nord. El vala sco ina da las vias d'aua cun il pli bler traffic ed è in'avaina zunt impurtanta e fascinanta en l'Europa. Er divers auturs rumantschs han laschà inspirà dal Rain, sco per exempel Toni Halter, Gion Caduff u Mariano Tschuor.
Ina cantata per il flum
Il scrivent sursilvan Theo Candinas ha scrit per il giubileum da 150 onns Chor viril Ligia Grischa (l’onn 2002) in text davart il Rain, il flum e si'aua, sco simbol per il nescher, crescher e flessegiar da la vita. Il dirigent dal chor da lura, Peter Appenzeller, ha fatg vitiers la musica. Igl è ina cantata per chor viril, chor da mattauns ed instrumentalists – in laud al Rain. Peter Appenzeller ha partgì l'ovra en totalmain 21 parts: «La canzun dil Rein I» fin «La canzun dil Rein VII». Tranteren datti adina puspè il «Refrain dil Rein» e singulas chanzuns sco per exempel «La cargada» u «La Tina biala».
Il 2002 ha RTR registrau il concert direct a Mustér en la halla da tennis. Ils interprets èn il Chor viril Ligia Grischa, la Mädchenkantorei Basel, il chor da giuvnas Cantori di Pregassona, la Chanson du pays de Neuchâtel ed il Cerchel musical dalla Surselva. Peter Appenzeller diregia.
