Dapi passa 30 onns organisescha il JBOG – Jugend Blasorchester Graubünden (l'Orchester d'instruments a flad da giuvenils Grischun) in'emna da musica per giuvnas e giuvens cun emprovas intensivas per preparar dus concerts finals. Dapi il 2023 è il giuven musicist Florian Schneider il manader. Ensemen cun Isabella Kraft han els dus organisà dirigent, manaders da register, localitads etc. per porscher a las giuvnas musicantas ed als giuvens musicants in'emna da musica.
Il lieu dal champ è la EMS-Schiers. La scola media da Schiers metta a disposiziun las localitads e sper tut la lavur d'emprovas intensivas han Florian Schneider ed Isabella Kraft er guardà ch'il divertiment na vegn betg a la curta.
Quest onn han deplorablamain be 35 giuvnas e giuvens sa participadas malgrà ch'il JBOG avess gì quest onn ina vaira corifea sco dirigent: Jean-Claude Kolly. Quest fatg fa in zic quitads als organisaturs sco er al president da l'Uniun chantunala da musica, Andy Kollegger. Er il fatg che be paucas persunas èn vegnidas al concert a Scuol il venderdi saira ha mussà ch'i dovra dapli sforzs per far reclama e per dar dapli attenziun a la promoziun da musicantas e musicants giuvens.
L'Artg musical preschenta il concert da Scuol. Jean-Claude Kolly ha mess ensemen in program variant dentant er pretensius per las giuvnas musicantas ed ils giuvens musicants.
L'entir concert è er da chattar sin Playfestas. Là pudais er tadlar ulteriurs concerts dal JBOG dals ultims onns. Sche ina u l'autra musicanta giuvna u musicant giuven ha gust da sa participar lura datti er ulteriuras infurmaziuns sin la pagina d'internet dal JBOG.
![](https://il.srgssr.ch/images/?imageUrl=https%3A%2F%2Fdownload-media.srf.ch%2Fworld%2Fimage%2Faudio%2F2020%2F07%2F615d8a03036e462cbee1e3f47b0d67ae.jpg&format=jpg&width=320)
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.