«The Dream of Gerontius» (titel original, op. 38) è in oratori d'Edward Elgar che ha festivà sia primaudiziun l'onn 1900. L'ovra tutga tar las pli impurtantas ovras dal cumponist englais e giauda gronda popularitad en sia patria.
Dals organisaturs dal «Birmingham Triennal Music Festival» dal 1900, il pli impurtant festival da chors da lez temp, ha Elgar survegnì l'incumbensa da scriver in'ovra per chors. L'emprim n'ha el betg pudì sa decider per il cuntegn. Suenter che l'organisaziun ha refusà sias ideas per in oratori d'Augustinus ed in oratori da Giudas ha el vulì refusar l'incumbensa. Il directur dal festival ha lura proponì ad el da metter en musica la lunga poesia spirituala da bunamain 900 lingias «The Dream of Gerontius». Igl è ina poesia ch'il cardinal John Henry Newman (*1801 – †1809) ha publitgà il 1865. Elgar enconuscheva la poesia che tracta da la mort e da la levada da Gerontius (deriva dal grec γέρον che munta «um vegl»). Gerontius stat dentant per mintga uman, «finadin». L'atun 1899 ha Elgar cumenzà a cumponer ed ha scursanì fermamain il text per ses oratori.
Cuntegn
La poesia descriva en ina retscha d'episodas liricas e dramaticas il viadi da l'olma suenter ch'ella ha bandunà il corp mort. Tenor la teoria da la Baselgia catolica (Elgar era catolic) va l'olma tras pliras regiuns da l'auter mund, lura tras il purgatieri accumpagnà d'in anghel protectur per la finala pudair guardar la gloria da Dieu.
L'oratori ha duas parts. L'emprima raquinta da l'ura da mort d'in um vegl, Gerontius che stat dentant per tut ils umans. La rolla da Gerontius vegn chantada d'in tenor. Suenter ina lunga introducziun instrumentala exprima lez en oraziun il stadi da l'olma. Enturn ses letg stattan ses amis ch'intuneschan in Kyrie ed uran per che l'olma vegn salvada. Sustegnids vegnan els d'in spiritual (chantà d'in bass) che dat er l'ultima benedicziun.
La segunda part raquinta dal viadi da l'olma che ha bandunà il corp mort. Al cumenzament frunta l'olma sin ses anghel protectur (chantà d'in mezzosopran). Sguland sperasvi a demunis che cumbattan per las olmas dals morts e sper anghels che salvan las olmas inscuntra ella er las olmas en il purgatieri (Fegefeuer). A la fin da ses lung viadi stat l'olma avant Dieu. Suenter l'intercessiun (Fürbitte) entras l'anghel da la mort (chantà d'in bass) vegn l'olma sentenziada en in soli mument. En la partitura statti en quest lieu: «For one moment, must every instrument exert its fullest force» (Per in mument sto mintga instrument sviluppar si’entira forza).
Silsuenter vegn l'olma prendida si tranter ils gests ed arriva en l'eternitad.
Ils interprets da questa registraziun dal 1976 èn Nicolai Gedda, tenor (Gerontius ed olma) / Helen Watts, mezzosopran (anghel) / Robert Lloyd, bass (spiritual ed anghel da la mort) / il chor ed il orchester dal London Philharmonic Orchestra / John Aldis Choir ed il maestro è Adrian Boult.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
