Frédéric François Chopin è naschì il 1810 en la Pologna. Ses bab era Franzos, sia mamma Polaca e perquai era el in burgais dubel. L'entira famiglia aveva in dun artistic e gia en ses giuvens onns è sa mussà il talent da musica da Frédéric. Si'emprima instrucziun da clavazin ha el gì cun set onns ed en quella vegliadetgna ha el er publitgà sia emprima cumposiziun: Polonaise en g-moll. Bainbaud han ins supplitgà el da sunar sin festas privatas da famiglias noblas da Warschau. Ses emprim concert public ha el dà cun otg onns. Las gasettas han titulà il giuven sco «Mozart polac».
Scolaziun
Frédéric n'era betg da ferma statura perquai ha ses bab tramess el mintga stad sin la champagna per rinforzar sia sanadad. Chopin charezzava la musica da la champagna e bleras da sias cumposiziuns temprivas cumprovan l'influenza da melodias popularas. Cura ch'el aveva 16 onns ha ses bab annunzià el al conservatori da Warschau. El ha er gì vinavant instrucziun privata tar Wojciech Zywny fin il 1922. Lez è stà ses sulet magister da clavazin ed ha er animà il giuven Frédéric d'improvisar al clavazin e da cumponer.
Sper ses studi da musica ha el survegnì sia furmaziun pratica e teoretica en spezial tar Józef Elsner, il directur dal conservatori. El ha cumponì bler e mussà sias ovras ad Elsner. Las ovras da Hummel e Kalkbrenner han inspirà al cumenzament sia musica gist tuttina sco las operas da Rossini e Weber. Tuttina ha Elsner manegià ch'el guntgeschia cun ses dun las metodas usitadas.
Dapli
Durant ses studi n'ha Chopin gì nagina instrucziun da clavazin pli. El ha lavurà a moda autodidacta ed ha sviluppà ses agen stil da sunar clavazin che ha manà el ad in fitg aut nivel da virtuositad. La stad 1829 ha el terminà il conservatori ed il settember dal medem onn è Chopin s'inamurà en la giuvna scolara da chant Konstanze Gladkowska. Durant questa romanza ha la grazia da la vusch umana, sia purezza e ses plainezza dal tun inspirà el a bleras cumposiziuns da clavazin.
Paris
In da ses emprims amis u eventualmain er marus (retschertgas han mussà che Frédéric Chopin è stà omosexual) era Titus Woyciechowski, in collega da studi e savens giast da la famiglia Chopin. Durant la relaziun cun Gladkowska duai el esser stà il confident, mussaments perquai na datti però betg. Gia durant sia giuventetgna è Chopin viagià bler, el ha vulì emprender d'enconuscher la vita musicala d'autras citads e ses artists. Uschia è el stà a Vienna e Berlin. El ha dentant savì ch'ils pli gronds musicists dal 19avel tschientaner eran a Paris. Il november 1830 ha el perquai bandunà Warschau e la Pologna ed è l'emprim anc ina giada returnà per intgins mais a Vienna.
Davent dal 1831 ha Chopin vivì a Paris ed ha fascinà il public sco virtuos da clavazin. Suenter il 1835 ha el gudagnà gronda reputaziun entras sia activitad d'instrucziun. Ils 17 d'october 1849 è Chopin mort, probabel en consequenza da tuberculosa.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.