La resonanza ch'ina orgla baselgia po crear en ina baselgia è insatge dal pli impressiunant ch'ins po udir en il mund da la musica. En la musica instrumentala po ina buna Brass Band vegnir detg datiers a questa resonanza. Quai na fa betg smirvegliar sch'ins patratga che omadus «corps» fan lur sun entras vibraziuns d'aria en bischens da metal. L'orgla fa quai a moda mecanica cun smatgar tastas e pedals e la Brass Band entras l'aria che las musicantas ed ils musicants suflan en lur instruments. Quest fatg ha dà l'idea da cumbinar las duas resonanzas en in concert communabel ed igl è remartgabel quant datiers ch'ellas vegnan ina a l'autra.
L'Artg musical porta las parts dal concert nua che l'orgla e la Brass Band sunan communablamain. Tranter auter la «Suite Gothique» da Léon Boëlmann, in ovra ch'è scritta original per orgla baselgia. Robin Bartholini ha orchestrà l'ovra per Brass Band ed orgla.
L'arbre et la graine
Al concert hai era dà ina primaudiziun, ina cumposiziun dal dirigent Robin Bartholini: «L'arbre et la graine», per rumantsch la planta ed il sem. Igl è ina poesia sinfonica, scritta en in toc e partida en dus episodas.
L'ovra cumenza e chala cun in choral che mussa sin il caracter ciclic dal tema: la mort d'ina planta e la naschientscha d'in sem che prui. Bartholini fa diever d'in ritmus u puls regular e constant che sa sviluppescha. El sforza l'auditura e l'auditur d'interpretar da nov l'energia creada e chatta sia valur en ina bellezza plitost meditativa.
Robin Bartholini ha scrit l'ovra a posta per quest concert ed er sco regal per la Brass Band Cazis. L'entir concert cun tut ils tocs chattais vus era sin playfestas.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.