Arturo Márquez è naschì ils 20 da december 1950 sco pli vegl dals nov uffants d’in musicist da Mariachi. Gia ses tat era musicist ed en il Mexico ha Arturo survegnì sias emprimas uras da clavazin.
En sia patria aveva el gia in num sco cumponist cura ch’el ha pudì festivar success internaziunal cun sia retscha da «Danzones» l’entschatta dals onns 90. En spezial la Danzón nr. 2 ha procurà per attenziun internaziunala. Ozendi vegn la musica da Márquez preschentada sin l'entir mund da numerus orchesters ed ensembles da chombra sco era da solistas e solists. In da quests solists è il trumbettist Pacho Flores che preschenta en l'emissiun il «Concierto de Otoño», in concert per trumbetta en trais parts.
Il 1980 ha Márquez gudagnà ensemen cun sia dunna, l'arpista Lidia Tamayo, in stipendi da la regenza franzosa. Durant dus onns è el sa perfecziunà en l'art da cumponer al conservatori a Paris. Pli tard ha el er anc survegnì in stipendi en la California nua ch’el ha lura terminà ses studis cun il master en cumposiziun.
Márquez ha era sa fatg in num cun musica electroacustica. Dapi il 2005 datti in festival da musica internaziunal deditgà ad Arturo Márquez.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.