Armin Caduff è naschì ils 8 da fanadur 1949 a Tavanasa. El è creschì si cun trais frars e duas soras, In dals frars è mort gia baud en consequenza d'ina malsogna. Il bab Salvator era scolast e manava dasperas ensemen cun la mamma Maria (nata Zortea) anc ina butia da chalzers. Sco magister era il bab d'Armin er engaschà sco dirigent ed organist uschia ch'il giuven mat ha pudì accumpagnar a l'orgla il chor baselgia che ses bab ha dirigì. Da pitschen ensi ha Armin gì il giavisch da far musica ed el ha survegnì instrucziun da clavazin tar las mungias a Glion e pli tard lura en il seminari da scolasts a Cuira. Lez ha el dentant betg terminà, memia grond era il giavisch da studegiar clavazin e musica a Turitg.
Suenter il studi da clavazin è Armin Caduff era sa perfecziunà en diriger. El ha frequentà dus semesters tar la Grischuna Sylvia Caduff che ha fatg gronda impressiun ad el. Er en chant ha el terminà il studi a Turitg ed è lura sa perfecziunà tranter auter tar la chantadura da Vienna Sena Jurinac ed ils tenors talians Gaetano Bardini e Mario Del Monaco.
Entant aveva Armin Caduff era fundà famiglia ensemen cun sia dunna Lisabet. Els han trais uffants e dus da quels chantan er en La Compagnia Rossini: il figl Flurin e la figlia Maria Catrina. Passa 40 onns datti gia questa furmaziun che tgira il belcanto. Avant la Compagnia Rossini hai però dà la furmaziun «Trubadurs Sursilvans». Cun quest ensemble da chant ha cumenzà la via da success e quai a Mustér en l'hotel Cucagna. L'ustier Gion Schwarz ha animà Armin Caduff da porscher ina sort divertiment durant la tschaina, musica dal temp medieval cun arranschaments ed era texts rumantschs. Or da quai è lura sa svilupada l'idea dal program «La cena è pronta» cun represchentaziuns en la sala da l'hotel Waldhaus a Flem cun musica classica. L'idea dal num Compagnia Rossini deriva dal cumponist talian che organisava fitg savens collegs ed amis en sia villa a Paris.
Uschia hai dà or dals Trubadurs Sursilvans la Compagnia Rossini che dat concerts en l'entira Svizra ed era sin cruscheras. Armin Caduff n'è betg mo pianist e chantadur. El ha era scrit divers musicals ed arranschà chanzuns rumantschas. Ed er actualmain è il musicist da 75 onns vidlonder da realisar in ulteriur musical «Plaun Salter». Quel duai avair sia premiera l'atun 2025.
La cumedia dils morts – docter per forza
Armin Caduff en emissiuns da RTR:
Artg musical:
Noss chors:
Profil:
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
