Gronda surpraisa per la scena da musica grischuna: la musica da giuvenils Brassorama sut la batgetta da Hanspeter Bircher gudogna cun il final quest «cumbat musical» cunter otg furmaziuns da la Svizra.
Brassorama è vegnì fundà dal scolast da musica Hanspeter Bircher cun 21 da ses scolars da la scola da musica Surselva.
Show da televisiun en quatter linguas
Il victur è vegnì tschernì en il rom dad ina show da televisiun en quatter linguas la sonda suentermezdi parallel sin ils emetturs SRF1, RSI uno e RTS 1. Nossa moderatura Elin Batista è vegnida accumpagnada da Jean-Marc Richard, Carla Norghauer e Sven Epiney.
Votum public e professiunal
Per pudair gudagnar la concurrenza ha Brassorama stuì persvader tant il public sco er ina giuria professiunala. La giuria sa cumponiva da trais stars da la musica svizra: la famusa Melanie Oesch, la chantadura da la svizra franzosa Phanee de Pool e Sebalter, che ha represchentà la Svizra il 2014 a l'ESC.
Lur vuschs han quintà per 50% – tschels 50% èn vegnids dad in televoting dal public da televisiun.
Il segund participant rumantsch è stà l’ensemble «PiCant» cun las dirigentas Flavia Walder e Rilana Cadruvi. Il chor cun las 17 giuvnas è vegnì da sa qualifitgar en la preselecziun da la sparta chor che RTR ha manà atras questa primavaira a Glion.
Ils finalists
Natascha e Maruschka Monney | Jodel | Friburg |
Mattia Albisetti | Mandolina | Tessin |
Kapelle Sondewend | Musica populara | Appenzell Dadens |
Coro Calicantus | Chor | Tessin |
Ensemble Schola de Sion | Chor | Vallais |
PiCant | Chor | Grischun |
Brässkalation | Brass | Argovia |
Brassorama | Brass | Grischun |
Valentin Claivoux & Quintin Bénet | Accordeon e piano | Vallais |
RR novitads 18:00