Gianna Nannini stà per rock & roll e feminissem talian
Las emprimas chanzuns da Nannini datti gia il 1976 e 1978, ma ils emprims success en ses stil rebellic e genuin cumparan pir l'onn 1979. Quella giada ha ella inscuntra a sia gronda amur musicala durant in viadi tras l'America: il rock’n’roll. E cun quel en ses agen stil e per talian vegn er l’emprim grond success – l'album cun il titel «California».
Però main il stil da musica, mabain ses texts e lur cuntegn explicit ed er feministic èn stads per quella giada ina pulita sensaziun en l'Italia tradiziunala e catolica. Però ella aveva avunda da sa laschar restrenscher da tradiziuns e convenziuns. Pir dal 1984, cur ch’ella aveva cumenzà la collavuraziun cun il producent Conny Plank e suenter che Gianna Nannini ha gì grond success en auters pajais da l’Europa, ha ella survegnì cun ses album «Puzzle» er en Italia la renconuschientscha sco artista e chantadura.
Suenter datti ina rotscha da hits: America, Fotoromanza, Bello e impossibile, Profumo, I maschi, Hey bionda, un ragazzo come te, Meravigliosa creatura – adina cun ses senn da marca: la vusch in pau gruglia ed engaschament total. Ed ella venda milliuns da ses discs.
Italia 90 – «Un’estate italiana»
Il 1990 datti la gronda fevra da ballape en l’Italia: i mondiali, e la squadra azura manchenta il final. L’atmosfera fantastica s’exprima però en la chanzun da Edorardo Bennato e Gianna Nannini, quella giada sin il zenit da lur carriera. Bennato è fascinà, però Gianna Nannini è da l’avis che la chanzun saja chaschiel commerzial. A la fin sa participescha ella tuttina, er pervia da ses bab ch'è in grond fan da ballape – e perquai ch’ella vesa er avantatgs per sia carriera. Als 8 da zercladur dal 1990 è la festa d’avertura en il stadion «Giuseppe Meazza» a Milan e Gianna Nannini ed Edoardo Bennato chantan «Un’estate italiana», ed ina milliarda persunas stattan davant las televisiuns. La chanzun daventa in hit mundial, ed en Italia resta ella 10 emnas sin l’emprima posiziun.
- 1976 – Gianna Nannini
- 1977 – Una radura...
- 1979 – California
- 1981 – G.N.
- 1982 – Latin Lover
- 1984 – Puzzle
- 1986 – Profumo
- 1988 – Malafemmina
- 1990 – Scandalo
- 1993 – X forza e X amore
- 1995 – Dispetto
- 1998 – Cuore
- 2001 – Momo alla conquista del tempo
- 2002 – Aria
- 2006 – Grazie
- 2007 – Pia come la canto io
- 2009 – Giannadream – Solo i sogni sono veri
- 2011 – Io e te
- 2013 – Inno
- 2014 – Hitalia
- 2017 – Amore gigante
- 2019 – La differenza
- 2024 – Sei nel l'anima
Gianna Nannini è er adina restada fidela a sias decleraziuns politicas e sociocriticas. Il 1993 è ella s’engaschada cun in concert da benefizi per l'organisaziun d'ambient «Greenpeace». Ses engaschament principal è però quel a favur dals dretgs da las dunnas.
L’onn 2010 ha ella procura per novitads che han fatg dapertut lingias grassas, cura ch'ella è daventada cun 56 onns per l’emprima giada mamma da sia figlia Penelope. Quai ha era chaschuna critica da differentas varts. Sin quella ha Gianna Nannini dentant reagì cool e manegia: «Sche Mick Jagger po daventar bab cun sur 70 n'è quai era nagin problem…».
Gianna Nannini a Tigingnas
Avant sur 40 onns aveva ella cumprà ina chasa en la regiun da Savognin ed era surtut l’emprim temp savens sin las pistas u sendas da velo da muntogna da Savognin. En ses chalet a Tigignas ha ella er cumponi plirs da ses hits. Avant 10 onns ha ella lura vendì la chasa, a tgi n'è betg enconuschent.
Certosa di Belriguardo: il bain da viticultura da Gianna Nannini
Dapli il 2006 è Gianna Nannini er viticultura, quai ha da far cun sia passiun per il vin. En ina cartusia dal 1300 cun 8 hectaras vignas en vischinanza da Siena produceschan ella e ses tschalerers differents vins toscans.