Cun musica da hip hop e rock enfin tar tuns fins è tut stà d'udir en l'ediziun dal 8x15 en il Palazzo a Cuira. Per l'emprima giada ha quest eveniment gì lieu a Cuira e per l'emprima giada era cun bands rumantschas: Pascal Gamboni e Giganto & Mattiu han pudì sunar sco acts finals.
Bumblebees
L'entschatta sin la tribuna en il Palazzo a Cuira han ils Bumblebees, ina band tessinaisa, fatg.
Cun massa energia, tuns per part scurrils ed outfits tut auter che da mintga di han els pudì persvader, era sch'il Palazzo n'era betg plain al cumenzament. Numerus fans èn vegnids dal Tessin fin a Cuira.
The Melodic Eggs
Cun ils quatter giuvens da Cuira dals Melodic Eggs è er il Palazzo s'emplenì. Sco matadors locals han els natiralmain gì svelt il public sin lur vart.
Tge stil da musica ch'els fan è dentant grev da definir. Davent da hip hop enfin rock è tut stà preschent. Er els quatter na pon betg propi definir lur musica u in gener specific.
Nic Gyalson
Nic Gyalson e sia band èn stads ils segunds represchentants da la Svizra taliana.
La cumparsa schenada ch'il giuven tessinais fascheva anc avant il concert è stada sco suflada davent cun ils emprims tuns da sia ghitarra. Nic Gyalson ha divertì il public cun rock plain power.
The Broots
Musica da buna luna - uschia pudess ins descriver la musica dals The Broots. La band da Losanna ha fatg sautar cun lur chanzuns er a tut quels che n'avevan enfin uss betg grond gust da far quai.
Lur sound è frestg, simpatic, scurril ma er plain energia. En tutta cas betg musica dal mintga di.
Bell Baronets
Cun Bell Baronets è il rock definitivamain turnà enavos sin tribuna. Cun massa power, solos da ghitarra e vuschs fermas han els dà fieu al public.
Per 15 minutas èn tut ils fans da rock vegnids catapultads enavos en il grond temp dal rock.
Hedgehog
Cun il rappunz Hedgehog è la tribuna puspè stada en mauns grischuns. Cunquai ch'il giuven è creschì si a Seewis en il Purtenz eran blers amis ed enconuschents en il public. Quai che fetschia schon vegnir el in zic gnervus, sco el ha sez ditg.
Dapi ch'el è stà «Best Talent» tar SRF3 sajan las spetgas insumma creschidas. Al public ha il rap da Hedgehog e sia partenaria da tribuna plaschì.
Pascal Gamboni
Durant las 15 minutas dal Tujetschin èsi stà il pli ruassaivel en il Palazzo. Pascal Gamboni è plitost quel dals tuns bufatgs e las melodias che van a cor. Tuttina han persunas chantà cun el sias chanzuns.
Gamboni ha dentant concedì, ch'el saja pli disà e sa sentia er meglier sin ina tribuna pli pitschna en ina atmosfera pli intima.
Giganto & Mattiu
La finiziun han ils dus Sursilvans Giganto & Mattiu dà. Cun chanzuns rumantschas ed ina buna purziun scharm han els anc ina giada procurà per buna atmosfera.
Era sch'els han dà divers concerts da cuminanza quest onn era la febra tuttina qua avant ch'ir sin tribuna. Sa mussar da la meglra vart en be 15 minutas fetschian els era betg mintga di.
Cun lur chanzun «Finiu» han els mess il punct final d'ina saira fitg varianta cun surpraisas musicalas ch'ins vegn probablamain anc ad udir pli savens.
