L’apparientscha da Monica Gutierrez El Ôrf, quella dat en egl, surtut en ina regiun sco l’Engiadina, nua ch’ins na vesa betg savens persunas che portan in faziel da chau ord motivs religius. Per ella tutga quel dentant tar sia vita dapi ch’ella ha 24 onns.
Da la Bibla tar il Coran
Educada cun ina cretta ferm catolica, è Monica El Ôrf ida curt suenter la naschientscha da ses emprim uffant a la tschertga da respostas. Chattà ellas haja ella en il Coran. Dapi là viva ella tenor il credo muslim. Las reacziuns sin via u er en butias sin sia apparientscha cun faziel da chau, sajan fitg differentas, per part deplorablamain er negativas.
I dat situaziuns nua che la glieud banduna l’ascensur sche jau vegn en, u er che persunas midan vart sin via per ma betg stuair cruschar.
-
Bild 1 von 5Legenda: Blau saja sia colur preferida, di Monica Gutierrez El Ôrf, che sa numna sco muslima «Amina». RTR -
Bild 2 von 5Legenda: Savens na portia ella betg il faziel da chau durant la lavur en la Brocki Samedan. RTR
-
Bild 3 von 5Legenda: Cun il faziel da chau sa sentia la Samedrina simplamain bain, admetta la mamma da dus uffants. RTR
-
Bild 4 von 5Legenda: Da quantifitgar tut la rauba e dir tge valur che sa chatta en la Brocki a Samedan, quai na saja betg pussibel. RTR
-
Bild 5 von 5Legenda: Grazia a sias enconuschientschas da linguas, è Monica Gutierrez El Ôrf bunamain buna da discurrer cun mintga client en in'autra lingua. RTR
Chattar cumpromiss
Durant sia lavur en la Brocki Samedan, che Monica Gutierrez El Ôrf maina ensemen cun ses um, na portia ella betg adina il faziel da chau. Quai per evitar malchapientschas e reacziuns negativas. Il basegn da pudair cumprar rauba da segund maun, quel saja fitg grond, er en ina regiun bainstanta sco l’Engiadin’Ota.
Ils blers n’han betg uschè in grond budget ed èn avisads da pudair cumprar vestgadira, rauba per la cuschina u er equipament da sport per in pretsch pli favuraivel.
«Multiculti»
Discurrer differentas linguas, tutga tar il mintgadi da la dunna cun geniturs spagnols. Suenter avair emprendì en scola a Schlarigna rumantsch e tudestg, saja vegnì tiers il franzos tras sia sora pli veglia. Pli tard er il talian ed il portugais che Monica El Ôrf ha emprendì durant la lavur en l'Engiadina. Entant discurra la dunna da 42 onns er la lingua dals Berbs. Tras ses um ch’è oriundamain dal Maroc sa maschaidian las duas culturas en lur mintgadi.