Ils 7 da favrer ha Bruno Ritter retschavì il premi da renconuschientscha da la regiun Malögia. Il pictur, illustratur e cartoonist oriund da Schaffusa è vegnì avant 38 onns en la Val Bregaglia. Sapientivamain guntgescha el la scena d’art per avair uschia dapli temp per lavurar.
Tuttina n’è l’um da 68 onns betg in eremit. El s’interessescha per ils desideris, dubis e deblezzas da l’uman ch’el transfurma en ovras d’ieli, da rispli u da tusch. Ina giada regordan las ovras als maisters da la Renaissance, in’autra gia a cartoons ord gasettas da satira.
-
Bild 1 von 8Legenda: L'artist en in autopurtret. MAD, Bruno Ritter -
Bild 2 von 8Legenda: Il chastè da Ritter a Chiavenna è prest diesch giadas uschè vegl sco l'artist sez. El n'è betg possessur, però locatari. La veglia praschun en la tur a dretga serva oz sco magasin da purtrets. RTR, Donat Caduff
-
Bild 3 von 8Legenda: En il dischurden da ses atelier sa senta il pictur sco da chasa. Avant 80 onns eran qua anc ils nazis. RTR, Donat Caduff
-
Bild 4 von 8Legenda: Davart sias colurs di l'artist: «Tut colurs da bunmarchà. Quai basta.» RTR, Donat Caduff
-
Bild 5 von 8Legenda: Cun tut las colurs pussaivlas e nunpussaivlas creescha l'artist ovras che dattan perditga d'in oraifer senn d'observaziun. Fotografias sco muster e models èn tabu. RTR, Donat Caduff
-
Bild 6 von 8Legenda: In maister da la renaschientscha? In Ritter! L'artist sa mova a moda suverana tranter differents stils (extract dal format original d'in maletg). MAD, Bruno Ritter
-
Bild 7 von 8Legenda: Vischinanza e distanza tranter umans è in tema che cumpara adina puspè (extract dal format original d'in dissegn). MAD, Bruno Ritter
-
Bild 8 von 8Legenda: Ritter illustrescha er comics. Il cudesch «Al me Mungac» raquinta davart in'excursiun disfortunada nua ch'el è sez in dals protagonists. RTR, Donat Caduff
Nus avain inscuntrà Ritter en ses atelier malordinà a Chiavenna e discurrì cun el davart la fascinaziun per instagram, tge ch’in auto da posta ha da far cun muments religius e tge ch’ins po emprender da dilettants.
Dapli da l'artist
Litteratura – Erica Pedretti
En la rubrica litterara sa fatschentain nus cun ina giubilara. Ils 25 da favrer festivescha Erica Pedretti ses 90avel anniversari. Nus dain in sguard sin l’ovra litterara da la scriventa ed artista.
Tip persunal – Gilbert & George
Suenter prest 30 onns turnan las duas figuras legendaras da l’art concepziunal a Turitg. Ils dus seniors, maisters da la provocaziun e fervents defensurs da la libertad da s’exprimer, preschentan en la Kunsthalle ina retrospectiva che sveglia las mirveglias.
Reprisa – Tonia Maria Zindel
Tonia Maria Zindel è ina da las pli renumadas acturas en Svizra. Ella ha giugà en blers films e serias ch’han gì grond success en Svizra. Tras ses engaschis ha ella pudì rimnar bleras experientschas en la branscha da film. Dentant la vita sco actura da professiun n’è betg mo splendur e traglischur.
RTR Magazin da cultura 11:00