Sco fundatur dal cristianissem sco atgna religiun vala l’apostel Paul. Ad el vegn savens dà la culpa dal antifeminissem da la baselgia. Ma el haja duas olmas, dian l’istoricher e scienzià da litteratura Kai Michel ed il biolog d’evoluziun e scienzià dal cumportament Carel van Schaik en vita e cretta. Dad ina vart è Paul a favur da las dunnas. Ma el ha transplantà las ideas dal moviment da Jesus en il mund roman grec. In mund anc pli patriarcal ch’il vegl Israel. E tge che vegn vitiers, bleras da las passaschas antifeministas n’èn gnanc da Paul sez.
Paul ha il cumenzament success perquai ch’el è en favur da las dunnas. Ma el metta er il fundament per ch’il cristianissem reussescha en quest mund patriarcal roman grec perquai ch’el attribuescha a las dunnas il segund rang.
L’emprim imperatur roman che convertescha tar il cristianissem è Constantin. El fa quai be ord motivs da pussanza. Ina religiun che pretenda ch’i dettia be in Dieu saja la religiun perfetga per in imperatur, dian ils dus auturs da «Die Wahrheit über Eva».
In Dieu en tschiel ed in imperatur sin terra che serva a quest Dieu.
Ina schanza da far fin cun il patriarcat vesan Kai Michel a Carel van Schaik cun la digitalisaziun. L’internet pussibilitescha contacts e raits socialas quai ch’è gia adina stà ina fermezza da las dunnas.
