La Marella - «Tge magnific legum – tge magnific medicament!»

Cura ch’el è arrivà en il Grischun, è il pur Stephan Stutz stà surstà da constatar che l’interess da metter diversas sorts da giabus en iert era fitg pitschen. Ma ozendi saja quai auter, era grazia al trend en connex cun las sorts da giabus plimà (Federkohl) che sa tschentan pli e pli savens sin noss tagliers.

A persunas che vulessan era cumenzar a metter giabus en iert, cusseglia il pur e commember da la fundaziun Pro Specie Rara da revegnir a las veglias sorts e da gughegiar d’experimentar e cuschinar il giabus en novas modas.

Tar l’autura Angelika Overath datti bunamain mintga di giabus sin maisa. Ma igl è suenter avair rabitschà davent in’infecziun grazia al suc da giabus, ch’ella ha cumenzà a retschertgar davart ils effects positivs dal legum sin nossa sanadad. Avant intgins onns ha ella publitgà il cudeschet «Krautwelten» ed è pli persvasa che mai: il giabus n’è betg mo bun en il taglier, el è era bun per nossa sanadad.

Mintga mais producescha la Drogaria Conrad a Müstair la «crema da giabus», in remedi inspirà da la terapia dal pader Thomas Häberle (1912 – 1997). Quest pader benedictin era da sias uras enconuschent sco «docter da giabus» e tractava mals da tuts geners cun quest legum.

La crema, en il commerzi dapi il 2017, è en sasez ina crema per la pel, ma adina dapli clients l’utiliseschan era per mals ch’era Thomas Häberle tractava cun giabus: reumatissem, artrosa, contursiun ubain era dafraid.