Esser ora en la naiv fa bain a l’uman. Tenor studis sa mussan effects positivs gia suenter 40 minutas en ina cuntrada ennavada. Per tgi che n’ha (anc) betg la naiv avant chasa, funcziuni speranza era cun in’emissiun da radio da 40 minutas.
Sco uffant siemiava jau savens da grondas planiras ennavadas.
En La Marella raquinta l’artista Ester Vonplon (*1980) da sia grond’amur per la naiv. Ch’i saja cun visitar glatschers, l’Arctica, ubain cun ir a chatscha d’insatge minuscul sco ina scrotta da naiv; Adina puspè tschiffa l’artista la bellezza da la naiv en sias fotografias abstractas e poeticas.
Ovras dad Ester Vonplon
In auter element da quest’emissiun èn passaschas da poesias rumantschas inspiradas da la naiv. En quellas vegn la naiv descritta sco «buna», «chauda», sco «privel» ubain schizunt sco «lenziel da mort».
Neiva, mo neiva, ti caulda neiv,
cuarcla bufatg igl uaul e la pleiv.