Ils 6 da mars 1932 è mort John Philip Sousa, il patriot american e cumponist da 136 marschs. El vala sco retg da marschs. Ses probabel pli renumà marsch «The Stars and Stripes forever» tutga tar mintga festa americana. Ulteriurs exempels da marschs ord sia plima èn: «Liberty Bell», «Semper Fidelis», «The Thunderer» u «The Washington Post».
Ses bab ha inscrit John al Corps da marina dals Stadis Unids da l'America per uschia impedir ch'il giuven da 13 onns daventia commember d'in orchester da circus. Cun 17 onns survegn el il rang d'in musicist. Il 1875 banduna el la musica da la marina per returnar tschintg onns sco dirigent. Sut sia direcziun daventa la musica da marina la pli impurtanta musica militara dals Stadis Unids. Er grazia a las registraziuns sin plattas fonograficas vegnan ses marschs derasads e fitg populars. Intgins da quels tadlain en l'ura.
Sin dumonda da John Philip Sousa creescha il constructur d'instruments James Welch Pepper da Philadelphia il 1893 il sousafon. Sousa vuleva ina tuba che po sunar envers ensi e sur il corps ora. Il 1898 construescha Charles Gerard Conn dal tuttafatg nov l'instrument. Quel daventa lura il model predestinà da Sousa.
L’emissiun preschenta furmaziuns da brass, armonias, fanfaras, musicas militaras, furmaziuns pitschnas ed auter pli.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.