![](https://il.srgssr.ch/images/?imageUrl=https%3A%2F%2Fdownload-media.srf.ch%2Fworld%2Fimage%2Faudio%2F2020%2F10%2Fbc9d66f7617a43e1a995fa0093ca0fcb.jpg&format=jpg&width=320)
Litteratura rumantscha da tadlar cura e nua ch’ins vul!
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
Il scriptur sursilvan Leo Tuor dat per l’emprima giada invista en ses pli nov raquint anc en lavur cun il titel «Robinson en Rezia». El prelegia in extract da quel text ch’è tipic Tuor: scrit spess e cun purtrets intensivs che demussan la pussanza da la litteratura.
![purtret da Leo Tuor en il studio da RTR](https://www.rtr.ch/static/cms/images/960w/7b4a5b.jpg)
In omagi cun profunditad poetica ed umur raffinà al postin, è il raquint da la scriptura engiadinaisa Romana Ganzoni. L’autura ha tschernì «Il postin», perquai che las postinas ed ils postins èn las unicas persunas che mainan anc mintga di persunalmain ed en furma fisica novas dal mund exteriur fin davant l’isch-chasa en quests temps da distanza sociala pervi dal virus.
![purtret da romana ganzoni en il studio da RTR.](https://www.rtr.ch/static/cms/images/960w/88d863.jpg)
Il raquint cun stil subtil dal scriptur engiadinais Dumenic Andry «Il quart sudà» porta il suttitel «üna skizza ramoschana» e maina en il vitg da sia uffanza, en stanza da scola cun la magistra sensibla Luisa Famos.
![purtret da dumenic andry en il studio da RTR.](https://www.rtr.ch/static/cms/images/960w/a3ceb46.jpg)
Rut Plouda maina cun stil concis reducì a l’essenzial tras in univers profund e poetic. Ella preschenta il raquint pli lung «Da giallinas e turpchentschas», in text sur da giaglinas e sur dal scriver.
![purtret da Rut Plouda en il studio da RTR.](https://www.rtr.ch/static/cms/images/960w/922d81.jpg)
La pli giuvna autura che contribuescha a «Peda per prosa» è la scriptura empermettenta Viola Cadruvi. La fin d’october è cumparì ses emprim cudesch cun istorgias fatalas, scrittas en rumantsch grischun. Tranter quellas istorgias è er «La curridra», in text che va sut la pel, scrit plain tensiun e cun nota surreala.
La sisavla episoda dal podcast vegn cumplettada cun il raquint «Time out» da l’autur Jürg Gautschi. El raquinta in'istorgia tragicomica sur d’in um, che passenta vacanzas malgartegiadas en tenda – sulet e persequità da ses passà.
![purtret da Jürg Gautschi en il studio da RTR.](https://www.rtr.ch/static/cms/images/960w/0e83f4.jpg)