La fossa da la schamana da Bad Dürrenberg deriva dad in temp, cura ch’ils davos chatschaders e rimnaders vivevan en Germania. I sa tracta da la pli ritga fossa da sia epoca – e dad in dals chats ils pli spectaculars da l’Europa. Igl è in viadi archeologic a noss cumenzament.
Ils onns 1930 eran ins persvadì d’avair chattà la cumprova ch’il pievel tudestg giaja enavos fin als emprims umans auts. «Ils archeologs da tempra naziunalsocialista han tegnì la dunna per in um vegl e da pel alva», di l’istoricher e scienzià da litteratura Kai Michel en Vita e cretta.
Nossa pel clera è be ina adattaziun al schlet nutriment.
Ils nazis han be vis ch’igl è ina fossa fitg ritga – ed ina tala fossa po be appartegnair ad in um. Ils onns 1950, durant il temp da la DDR, ha in antropolog vis che la batschida è segir quella dad ina dunna.
Entras l’archeogenetica savain nus che la dunna aveva pel stgira, ch’ella aveva chavels stgirs, egls blau-verd-brins. Grazia a l’examinaziun da l’ossa savain nus er ch’ella era nutrida fitg bain, ch’ella era fitg sauna e ch’ella mangiava fitg blera charn.
Tge ch’ins sa sin fundament da las perscrutaziuns actualas è, che la dunna da Bad Dürrenberg aveva anomalias. Ella aveva ina anomalia vi dals spinals sisum che portan il tgau. Ed ella aveva er in nistagmus. Quai è ina malsogna tar la quala ils egls sa movan svelt e nuncontrolladamain.
Quest nistagmus sto avair vesì or terribel ed avair fatg tema – sco oz era. La glieud da lezzas uras na saveva betg danunder che quai vegn ed igl è evident ch’els pensavan che la dunna vegn attatgada da spierts.
Avant 9’000 onns na vegnivan las baras per regla betg sepulidas en fossas. Ellas vegnivan pendidas en plantas u surlaschadas a la natira. Ins sepuliva be persunas impurtantas ed en il cas da la schamana – cun fitg blers objects.
Ella ha ina fossa fitg ritga. Igl è la pli ritga fossa da l'Europa da quest temp ed ella tutga ad ina dunna. E la schamana aveva cun ella in uffant en fossa, dentant betg ses agen.
Però betg be la bara da la dunna e da l’uffant ed ils objects en fossa èn tenor Kai Michel spectaculars. L’entira architectura da la fossa ha fatg surstar. I sto esser stà ina lavur enorma da bajegiar la fossa.
