La Sonda lunga è era ina plattafurma per la stamparia a Haldenstein. Cun organisar in'exposiziun en la gallaria da la citad da Cuira po in vast public prender invista da las lavurs ch'èn vegnidas creadas a Haldenstein. «Questa visibladad è impurtanta per nus», di Annatina Dermont ch'è la presidenta da l'uniun che stat davos la stamparia a Haldenstein. «Tar nus en l'atelier na vegnan visitaders betg suvent be uschia, perquai pudain nus sin questa via far visibla nossa lavur».
La stamparia che sa chatta en il plaunterren dal chastè a Haldenstein è in lieu bain endrizzà. L'odur da tincturas e colur è en l'aria. Las maschinas vegnan messas en funcziun a maun. Las participantas èn cumplainamain focussadas sin lur maletgs. Tut regorda in pau vi d'in auter temp – igl è ruassaivel e fitg atmosferic. Qua pon persunas interessadas lavurar, stampar, barattar ideas ed opiniuns.
Nus vulain d'ina vart promover artists professiunals da lavurar cun tecnicas da squitsch.
Da l'autra vart veglia l'uniun era far accessiblas questas tecnicas ad in vast public – e quai cun organisar curs en il lavuratori a Haldenstein, ha Annatina Dermont agiuntà. L'uniun haja era schont gì crisas en il decurs dals davos 25 onns. Quai oravant tut pervi da la dumonda co promover e co vegnir tar las finanzas necessarias. La lavur che vegnia fatga saja numnadamain per la pli gronda part lavur voluntaria.
