«I fa mal, ma il plaschair è pli grond»
En paucas emnas sa serra la porta da vaider da la stizun da la mazlaria Wyss a Trun per in temp betg definì. Suenter 70 onns va l'istorgia da la mazlaria Wyss a Trun a fin ils 31 da december 2024. In fatg che sveglia emoziuns tar Fritz Wyss ch'ha lavurà 45 onns da sia vita en il manaschi da famiglia. «Muments emoziunals hai gia dà tar nus. Clientella da la Bassa che fa vacanzas da stad en Surselva è passada tar nus per prender cumià, quai ha commuventà fitg ferm», di Fritz Wyss. Tals muments vegnan probabel a sa repeter er en las proximas emnas.
Il grond finale vegn ad esser tar il tschaiver a Trun, lura datti la davosa giada noss zagrenders da tradiziun.
L’onn 1986 aveva el surpiglià il manaschi da meztga cun producziun da charn e stizun da ses geniturs. Avant è el stà set onns emploià da ses geniturs. Oz guarda Fritz Wyss enavos cun gronda satisfacziun e plaschair sin tut quels onns.
Senza l'agid da mia dunna Andrea e da noss persunal, na fissi betg stà pussaivel dad avair success sur tants onns.
«Igl è bun che nus avain uss bler da far, uschia n'avain nus betg temp da ponderar tge ch'ans spetga», conceda Fritz Wyss. I fetschia bain in pau curius en il venter da pensar che quest onn è il davos ch'els pon servir lur fidada clientella sur ils dis da festa la fin da l'onn.
Muments da giudiment
-
Bild 1 von 7Legenda: In team da success. Fritz Wyss e sia dunna Andrea Wyss Caviezel. 41 onns han els lavurà maun en maun e dapi passa 36 onns van els cuminaivlamain tras la vita. Andrea Wyss -
Bild 2 von 7Legenda: Ina vitrina ch'envida d'entrar e cumprar. Andrea Wyss è sur tut ils onns stada responsabla per la decoraziun en stizun ed en vitrina. Andrea Wyss
-
Bild 3 von 7Legenda: Liongias setgas ch'èn vegnidas premiadas cun sigil d'aur. Fritz Wyss è en tut ils 45 onns adina puspè vegnì distinguì cun premis per sias liongias cun agen recept. Andrea Wyss
-
Bild 4 von 7Legenda: Plattas fraidas en tut las furmas e variaziuns. Plattas fraidas èn daventadas la spezialitad dad Andrea Wyss. Andrea Wyss
-
Bild 5 von 7Legenda: Per mintga festa, sia platta fraida. En mazlaria Wyss a Trun po la clientella eleger furma e grondezza da las plattas fraidas. Andrea Wyss
-
Bild 6 von 7Legenda: Platta fraida cun pulpa e schambun, decorada cun fritgs exotics. Quai ch'è bel per l'egl è era bun per la bucca. Andrea Wyss
-
Bild 7 von 7Legenda: La vasta schelta da charn vegn a mancar a la clientella. Cordon bleu ma era liongias da purs, filets e spiduns tutgan tar las delicatessas en la vitrina da charn. Andrea Wyss
Manaschi da generaziuns
L'istorgia da la mazlaria Wyss a Trun ha cumenzà avant 70 onns cura che Fritz Wyss senior e sia giuvna famiglia han bandunà il chantun Lucerna per fundar lur interpresa da mazlaria a Trun. La mazlaria Wyss era en cumplaina fluriziun cura che Fritz junior è naschì. L'uffanza ha Fritz Wyss passentà a Trun. Ils onns d'adolescenza han manà il giuven en il gimnasi a Mustér e lura en Svizra franzosa. L’emprendissadi ha Fritz Wyss fatg a Sursee.
Da mattatsch schev'jau: jau fatsch tut – auter che mazler.
Tge ha fatg midar opiniun il giuven Fritz da lezzas giadas da tuttina entrar en la branscha da producziun da charn? Tge svilup, crisas e success ha el traversà sco interprendider en la branscha da charn durant sia vita e pertge n’èsi betg stà pussaivel da chattar ina successiun per la mazlaria da tradiziun?
Dals onns sco interprendider ma era da sia passiun per sia famiglia, per ses biadis e per la musica ans raquinta Fritz Wyss da Trun en l'emissiun «Profil».
In’ura cun biografias, destins, istorgias ed experientschas da giuven e vegl ch’han da dir u da raquintar insatge.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
RTR preschenta mintga mesemna in’autra tratga per cuschinar suenter.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.