Bunamain l'entira vita da lavur è Erwin Ardüser da Laax s'engaschà per il rumantsch. 31 da quels onns ha el lavurà en las pli differentas funcziuns per RTR. Avant in pèr mais è el ì en pensiun anticipada.
Vacanzas n’hai jau betg gugent. Vacanzas associesch jau cun smarschunar sper la mar ni stuair ir en museums ni en baselgias. Vacanzas n’hai jau mai fatg voluntaramain.
Da RTR plascha ad Erwin Ardüser cunzunt il radio, la flexibilitad e la spertadad. I na dat nagin auter med ch’è usche spert sco il radio, di Erwin Ardüser en il Profil da RTR. Ad el plascha er ch’ins è ozendi creativ e ch’ins emprova chaussas. Ma el giavischass dapli temas retschertgads, atgnas istorgias, ed era temas pli spinus e discutads pli profund. Pli baud fascheva RTR talas chaussas, en il rom da las pussaivladads. Ils basegns e las pussaivladads èn creschids, las resursas e las finanzas dentant betg en il medem tempo.
Il tempo è vegnì tut in auter ch’avant 30 onns cura ch'jau aveva cumenzà, lura avevan nus dapli peda.
Quatter onns ha Erwin Ardüser lavurà sco correspundent da radio da la Surselva a Glion. La sfida era da lavurar sur sasez, da decider sez davart temas da la Surselva e da plazzar quels a Cuira.
Ils quatter onns sco correspundent a Glion èn stads ils pli bels tar RTR.
Erwin Ardüser è avant paucs mais ì anticipadamain en pensiun. Il medem mument ha el er dà giu quasi tuttas incumbensas en uniuns, clubs ed organisaziuns.
Cun tut mias incumbensas èn agens projects vegnids a la curta. E cunzunt er il temp liber, il far nagut.
Ina gronda passiun dad Erwin Ardüser è il teater. Entaifer ils onns ha el er giugà rollas grondas sco quella da Romeo en «Romeo e Giulietta» ch’è vegnì dà avant blers onns a Laax. Ma il teater è en ina furma ni l’autra adina stà part da la vita dad Erwin Ardüser. Saja quai cun far selecziuns per tocs, cussegliar ni far adattaziuns.
Quai che fa mal, ch’i n’è betg reussì da bajegiar si a Laax ina gruppa da teater en il senn sco gruppa fixa.
