L'orchester sinfonic da giuventetgna svizzer (SJSO) exista dapi 50 onns. El vala sco la squadra naziunala U25 en il mund da la musica. Tgi che po sunar en quest orchester, rimna custaivlas experientschas per sia carriera musicala.
Per lur davosa turnea svizra han las 107 giuvnas musicistas e musicists preschentà la 7avla sinfonia da Gustav Mahler. L’emna da prova ha giu lieu l’atun passà a San Murezzan.
Ils giuvens musicists e las musicistas vegnan da tut las quatter parts linguisticas da la Svizra, la Rumantschia è preschenta cun il trumbettist Jon Flurin Buchli da Domat. Cun ses 24 onns è el in dals paucs giuvens en l'orchester sinfonic da giuventetgna ch'ha gia ina plazza fixa en in orchester professiunal. Dapi trais onns è Jon Flurin Buchli commember da l'orchester da Basilea.
La musica unescha la glieud che na enconuschan betg in l'auter. Tuts chapeschan il linguatg da la musica.
A l’entschatta era il dirigent envidà Christoph-Mathis Mueller magari sceptics, mo svelt è el stà entusiasmà dals giuvenils.
Els dattan simplain tut.
L’october passà ha l’orchester sinfonic da giuventetgna svizzer preschenta en la Tonhalle a Turitg sia interpretaziun plain energia da la 7avla sinfonia da Gustav Mahler. La registraziun directa al concert ils 20-10-2023 è da tadlar en la qualitad da tun 5.1.
