A partir dal suentermezdi a las quatter arrivan ils emprims musicists e las emprimas musicistas tar il chastè da Haldenstein. Cunzunt quels e quellas che sunan instruments pli gronds – sco il cuntrabass u la percussiun – vegnan a temp. Las gardarobas èn drizzadas en simpel: Sin duas maisas lungas deponan musicistas e musicists las cofras da lur instruments, sin las sutgas u er giun plaun hai plaz per deponer tut l'autra rauba, sco p. ex. la vestgadira da concert u la tastga da tualetta.
L'atmosfera è savens pli lucca che quai che la glieud che sesa en il public imaginescha. Igl è pli viv e pli legher e dad aut.
Da gnervusitad n'hai betg fastizs. Forsa er grazia a l'atmosfera famigliara che regia aifer il team da l'orchester. Cunquai ch'i na dettia nagina concurrenza tranter musicistas e musicists, saja l'orchester sco ina gronda famiglia, tradeschan plirs. Ch'i saja fitg spezial e bel da far musica ensemen en quest orchester, conferma er in musicist che suna uschiglio en auters orchesters, sco p. ex. en l'orchester da la Tonhalle.
In concert per persunas surdas
En il mund da Sonja Lacava esi adina quiet. Ella è surda dapi la naschientscha. Ella n'auda nagut, na sa betg co musica tuna. Al public viewing d'in dals concerts en il chastè da Haldenstein che vegn emess sin il Kornplatz a Cuira, ha la dunna da 40 onns fatg gievgia saira ina experientscha dal tuttafatg nova: Sonja ha senti per l’emprima giada musica! Cun ina vesta che oriund vegnida sviluppada per gieus da computer, vegn la musica che la Filarmonia da chombra dal Grischun suna, transfurmada en vibraziuns.
«Als die Sonn uffgieng» – in’ovra per ils 500 onns Grischun
Sper la 9avla da Beethoven, chanzuns d’amur da Gion Antoni Derungs ha la filarmonia da chombra grischuna preschentà gievgia saira ina premiera musicala en il rom da las differentas occurrenzas da «Festspiele im Schloss» a Haldenstein.
Il cumponist e violinist David Sontòn Caflisch ha numnadamain survegnì l’incumbensa da cumponer in’ovra contemporana per quest’occurenza, quai a chaschun dal giubileum da 500 onns Trais Lias.
Cumponer musica per in giubileum istoric n'è betg insatge ch'jau fatsch mintgadi.
Per il cumponist ch’è naschì a Basilea e creschì si en Grischun, era cler da l’entschatta che per in giubileum duai nascher in’ovra festiva e maiestusa. Sper tuns barocs sco per exempel musica d’encurunaziuns, battens u nozzas hajan ils suns dals zains inspirà el per sia lavur.
L’ovra represchenta la ritgezza da l’istorgia e la cultura grischuna, quai cun colliar la forza da lingua e musica. L’orchester e las vuschs d’in ensemble vocal s’uneschan ad in grond zain ch’è accumpogna l’auditurA durant tut il toc. En pli gioga er la pledadra ina rolla impurtanta. Cun texts rumantschs, talians e tudestgs represchenta ella quatter differentas dunnas da differenta vegliadetgna e caracter. L’orchester, l’ensemble vocal e las quatter dunnas mainan il public en in mund mistic e pensiv.