Amur, di l’artist Constant Könz, vegnir amà sco uffant è la meglra partenza per ina buna vita. Cun ses 92 onns experientscha da vita guarda el enavos cun ina tenuta calma e plain bainvulientscha sin sia biografia e tut ses plaschairs e sias sfidas. El è persvas ch'era las difficultads gidan a crescher.
In buna part saja destin, è el persvas. Ma cun ina tenuta interna, cun patratgs positivs e cun ina buna purziun cretta en il bun, possian ins navigar conscientamain cun success, plaschair ed engraziaivladad tras la vita. Ed adina puspè dettia segns che mussan la via. Uschia haja in accident cun l'auto mussà ad el, ch'i saja temp da sa deditgar a sia vaira passiun, a la pictura ed a l’art.
Constant Könz raquinta dal nudar tras il mar da la vita, da l’atmosfera en la stiva da sia nona a Guarda e tge ch'in salesch ha da far cun sia filosofia d’ina buna vita.
