Sco uffant vegn ditg «Cura che ti es creschì lura poss ti far ... u lura chapeschas ti co ch'i marscha». Ina construcziun che nus tuts e tuttas enconuschain. Ina giada arrivà en il mund dals charschids realisain nus bainprest che nus n'avain mai respostas sin tut nossas dumondas. E che nus n'ans sentin insumma betg adina propi creschì. Ma tge è quest sentiment dad «esser creschì» e tge munta quai?
Monica Andreoli, Silvana Casaulta e David Eichler èn trais persunas che han tuttas in different connex en lur vita cun il «esser creschì». Per mia reportascha da «Clic» ha jau dà in sguard sin lur situaziun da vita e vulì savair da Monica, Silvana e David cura ch’els sa sentan creschids u creschidas e tge che quai munta per els.
Monica Andreoli – independenza cun in'atgna abitaziun
Monica Andreoli ha 20 onns e viva dapi curt temp en sia emprima atgna abitaziun. Per ella èsi in pass impurtant sin la via tar la vita creschida. «Jau ma sent bain da savair che jau finanziesch sezza mia abitaziun e ch'jau sun responsabla che tut marscha», di ella loscha. La giuvna da Vignon ha fatg avant in onn il pass giu la Bassa e lavura là en in hotel nobel en il chantun da Sviz.
Monica ha gia baud emprendì da surpigliar responsabladad – betg il davos perquai ch'ella ha stuì esser qua sco sora la pli veglia savens per ses fragliuns pli giuvens. Ella ha dentant sa tschentà la dumonda, nua ch'ella tutga a lunga vista. La midada da la patria a la nova vita è per ella anc in process.
Silvana Casaulta – gronda responsabladad sur notg
Per tschertins cumenza la vita creschida pli baud che quai ch'els sezs avessan spetgà quai. Silvana da Lumbrein, 34 onns, ha stuì vegnir creschida praticamain sur notg. Ses bab è sa disgrazià en ils culms e Silvana è stada avant la decisiun da surpigliar il puresser cun 64 vatgas.
Ozendi di Silvana che quai saja forsa stà ina decisiun in zichel naiva cunquai ch’ella n’era betg pertscherta tge che quai veglia propi dir, ma ella faschess il medem anc ina giada. Ella menziuna ch’ella n'haja mai stuì desister da temp liber e che la decisiun fiss pli baud u pli tard stada la medema. L'istorgia da Silvana mussa ch'il daventar creschì ha savens da far pli pauc cun la vegliadetgna che cun las circumstanzas e ch'ins po era cun gronda responsabladad anc giudar la vita ed avair muments levs e leghers.
Dapli reportaschas per streamar
David Eichler – la libertad da esser uffant
David ha 43 onns e vesa sassez anc adina sco betg propi creschì, el saja «in giuven spiert en in vegl corp» sco quai ch’el di. Per el n’è esser creschì betg ina grondezza fixa, mabain in act flexibel tranter responsabladad e libertad uffantila. Giugar, raquintar istorgias, l'umor ed il pudair sa fascinar per pitschnas chaussas giauda David e stat era tar quai. Quai per exempel en ses job sco social media manager tar l'Ospital chantunal a Cuira. Là possia el duvrar ses umor ed esser fitg creativ. Ma el haja stuì emprender d’ir enturn cun ses uffant intern, acceptar quel, laschar tier quel ed er emprender da controllar el.
Il «esser creschì» – forsa be in'idea?
Tge munta quai pia dad esser creschì? Las istorgias da Monica, Silvana e David mussan ch’i na dat nagina resposta generala. Esser creschì è in process – marcà da responsabladad, d’independenza e svilup persunal. Mademamain na datti betg be ina versiun da tai e da mai, i na datg betg il «esser creschì» e nus tuts e tuttas avain er in uffant intern. Magari sun jau l’um da mia dunna, il colleg da lavur, il bab da famiglia u il conscolar da pli baud. En tut questas rollas sun jau magari pli creschì ch'en autras, e quai è er ok uschia.
Nus n’essan ina giada per adina creschì, quai è er betg la finamira e plitost in’idea.
Er il psicoterapeut Arno Arquint è da l'opiniun ch'il «esser creschì» na saja betg ina finamira ch’ins cuntascha, mabain ina via ch'ans accumpogna per vita duranta. Forsa saja era gist quest realisar ed acceptar da betg adina esser creschì che lascha esser nus vairamain creschids.
Cura es ti ta sentì u sa sentida per l'emprima giada propi creschida u creschì? Scriva a mai sin clic@rtr.ch, jau ma legrel da tes messadi!
