La vita professiunala ha Cilgia Rest passentà per gronda part tar la medema patruna da lavur. Dapi 24 onns lavura la dunna oriunda da Susch tar la Banca Chantunala Grischuna, dapi tschintg onns en la funcziun da directura da las agenturas en Engiadina Bassa, Val Müstair e Samignun.
Il contact direct cun la clientella la stettia anc adina ferm a cor. Era sch’i dettia mintgatant situaziuns betg agreablas, per exempel sche la banca sto dar ina resposta negativa ad ina dumonda per in credit.
Dir na n’è mai bel, ma fa mintgatant da basegn.
I vegnia tuttina anc adina fabritgà savens novas chasas en Engiadina Bassa, agiunscha la banchiera. Grond’influenza sin ils affars hajan gì tant la lescha da limitaziun da segundas abitaziuns dal 2011 sco er la situaziun durant la pandemia, resumescha Cilgia Rest las grondas sfidas dals ultims onns.
Corona ha bunamain chaschunà in incendi sin il martgà d’immobiglias en Engiadina Bassa.
Tschintg onns ha Cilgia Rest fatg ina pausa dal mund da banca. In da quels ha ella nizzegià per far in viadi enturn il mund. Cura che la dunna da 49 onns è turnada en Engiadina, ha ella manà durant dus onns in hotel a Zernez. Ella è però vegnida a la conclusiun ch’il mund da finanzas saja tuttina sia gronda passiun, uschia ch’ella è puspè turnada sin banca.
Recreaziun chatta Cilgia Rest l’enviern faschond sport da naiv e la stad en ses iert. Quel e la chasa ch’ella e ses partenari han cumprà avant dus onns a Scuol porschian blera occupaziun.