Il giuven Tuatschin Carlo Caduff ha smess ses emprendissadi per daventar battarist. Suenter ses studi da battaria ha el mess tut sin ina carta, pachetà sias set chaussas ed è ì a Berlin. A l’entschatta ha Carlo Caduff anc lavurà sco tatuader e scolast da battaria. Pass per pass ha el fitgà pe en la scena da musica da la chapitala tudestga. Suenter lavurs da studio ed engaschaments sco battarist live cun numerusas bands sco Fil Bo Riva, Abay u era Sebastian Madsen ha il Sursilvan survegnì il job sco battarist live tar la chantadura Zoe Wees. Quest engaschament è stà impurtant per sia carriera ed ha catapultà el dad ina tribuna gronda a la proxima. La stad passada ha il battarist tuatschin sunà a festivals da renum sco Moon & Stars a Locarno, Deichbrand u era Lollapalooza a Paris.