Tenor la teologa e preditganta evangelica Hanna Jacobs è il servetsch divin tradiziunal da la dumengia vi da murir ora. En ina columna en la gasetta tudestga «Die Zeit» ha ella dacurt reflectà ses temp sco reverenda a Hildesheim en Germania e co ch'ella prelegeva la dumengia en damaun la messa davant gnanc in tozzel da persunas.
Cunquai ch’ils bancs vids èn gia dapi onns ina realitad, sa tschenta la dumonda, sch'ins duess propi cuntinuar cun quai, per amur dals paucs e dals pli vegls, fin che nagin na vegn pli.
En quest connex sa dumonda ella, sch'i na fiss betg pli scort da stritgar u almain reducir il servetsch divin da la dumengia. E da dar liber uschia temp ed energia che las Baselgias dovrian uschè urgentamain per sviluppar ina nova spierta. Il servetsch divin da la dumengia saja in relict da temps passads, el n'haja betg mo pers l’attractivitad, mabain era la legitimaziun, explitgescha Hanna Jacobs.
![Die leeren Kirchenbänke haben die Theologin Hanna Jacobs zum Nachdenken gebracht.](https://www.rtr.ch/static/cms/images/960w/810a1c.jpg)
Il mantegniment stoic da las duas grondas baselgias al cult divin sco ‹product da parada› è ina perdita dal senn per la realitad.
Ina renovaziun è tenor Jacobs urgentamain necessaria. Co che umans vivan oz lur cretta – en cumparegliaziun cun pli baud, sch'il predi e la communitad cristiana èn ord diever e tge novs formats che pudessan tenor ella emplenir puspè dapli las baselgias, tradescha reverenda Hanna Jacobs en «Vita e cretta».