Suenter il studi da scolast secundar a Friburg è Armon Bearth sa chasà cun sia famiglia a Sumvitg. Paucs onns pli tard ha il scolast oriund da Casti bajegià chasa a lur dal vitg, ina chasa che dat en egl, ina chasa in zic autra che las autras. La chasa da lain cuverta cun schlondas ha dentant carmalà bain-inqual fan da l'architectura a Sumvitg. Insaquants hajan schizunt sbaglià la chasa cun la chaplutta da l'architect Peter Zumthor a Son Benedetg, di Armon Bearth.
Il principal d'esser scolast è d’avair gugent ils uffants ed ils cumbats cun ils giuvenils.
Il scolast Armon ha vivì quasi sia entira vita per las scolaras ed ils scolars. El è stà in scolast modern, avert, spontan e cun bleras ideas. Gia durant ils emprims onns da scola a Sumvitg ha Armon Bearth tranter auter inizià il project «Tenero», in'emna da sport al Lago Maggiore en il Tessin. Ir cun canu, raiver, dar tennis u ir cun velo, quai be intginas da las activitads durant quell'emna chè daventada per bleras scolaras e blers scolars in dals puncts culminants durant ils onns da la scola superiura.
Jau ma legrel sin la pensiun e las proximas aventuras da la vita.
A cor stat ad Armon Bearth er la musica. A Sumvitg ha el er embellì numerusas festas ecclesiastica cun sunar l'orgla, in instrument che gia ses tat e ses bab sunavan. Er a chasa tutga il sunar, il chantar u simplamain il tadlar musica tar il mintgadi, il pli gugent ensemen cun la famiglia.
