«Jau faschess tut anc ina giada»
Cun 33 onns è Alois Bearth da Curaglia suandà ses siemi da viagiar tras l’America Latina. Venezuela, Ecuador, Peru, Bolivia, Chile, Argentina e Columbia. En la metropola da Medellin en Columbia, ha il Medelin cun desideri da viver novas aventuras chattà amis e creà ina bella rait da contacts. Trais giadas è el stà en Columbia per emprender d’enconuscher meglier il pajais, la lingua e la mentalitad. L’onn 2010 ha il scrinari e tecnicher spezialisà Alois Bearth decidì d’emigrar. Persvas ch’il mund haja da porscher bler dapli che la Svizra, è el partì senza bigliet da return.
Jau faschess tut anc ina giada, ma tut pli intensiv, cunzunt il viagiar per il mund.
Durant quatter onns ha el lavurà en la metropola da trais milliuns abitants Medellin en differentas scrinarias. Lura è vegnida l’opportunitad da surpigliar l'inventari da scrinaria d'in anteriur patrun ch'era vegnì engianà a moda perfida. Ensemen cun sia amia indigena Belsy Castaño, han els fatg flurir questa scrinaria durant nov onns cun enfin set emploiads.
Senza mia partenaria Belsy n'avess jau betg pudì avrir ina scrinaria a Medellin. Ella è ferma ed intelligenta.
Il fanadur 2023 han Alois e Belsy dentant serrà e vendì lur scrinaria a Medellin. Suenter 13 onns experientschas, vita e mentalitad latina è il pèr vegnì en Svizra a Curaglia en Val Medel. Suenter in lung e cumplitgà process per recaltgar scrittiras per pudair vegnir legalmain cun Belsy Castaño en Svizra, han els finalmain maridà civil. Malgrà che maridar na fascheva betg part da lur plans da vita.
Co è Belsy Castaño, la dunna columbiana s'integrada en Val Medel? Tge experientschas professiunalas e persunalas han laschà sentir Alois Bearth la Columbia sco segunda patria per Alois Bearth? Davart la nostalgia per la Columbia, ma era davart ils plans e siemis ch'il pèr svizzer-columbian ha per il futur, raquinta Alois Bearth en il «Profil».
