Da la simpla servitura a la dunna cun giudizi
«Ina buna mamma ha dapli pussanza che ina ferventa votanta» scriveva il comité contra en ses inserats ed il comité pro ha replitgà il medem onn: «Bunas mammas na vulan betg pussanza ellas vulan servir e quai era en il stadi». Quai èn dus inserats ch'ins chatta en la pressa grischuna dal 1959 en occasiun da l’emprima votaziun federala per introducir il dretg da vuschar da las dunnas. Las discussiun han dentant entschet gia il 19avel tschientaner ed a partir dals onns 1920 hai dà en differents chantuns numerusas tentativas per introducir il dretg da vuschar. Iniziativas ch'ils umens han consequentamain refusà a l’urna.
Discussiuns animadas e cumbats fervents durant decennis e fin il di avant la votaziun dals 7 da favrer 1971. Tge è sa midà cun l’ir dal temp en ils arguments? A maun da las gasettas grischunas sa metta la Marella als fastizs da quest’evoluziun da la buna mamma a la votanta ferventa. U sco ch'il reverenda refurmà Rico Parli scriva en ina charta da lectur, i sa tracta dal «pass da la homocrazia a la democrazia».