Dapi 30 onns emetta RTR di per di l’emissiun Impuls. Auturas ed auturs rumantschs porschan qua patratgs e stimuls per cumenzar il di, istorgias vairas ubain inventadas. Er grazia a quest’emissiun è la scena da litteratura rumantscha oz viva e vasta sco anc mai.
Per festivar il giubileum ha RTR envidà en venderdi, ils 9 da zercladur ad in aperitiv litterar a Cuira. La scriptura Rut Plouda, ils scriptur Leo Tuor ed il giuven autur Janic Maskos han prelegì impuls novs e vegls. Els èn sa fatschentads cun la bellezza dal vocabulari e sias particularitads. Claudio Spescha ha tegnì in pled festiv per il giubileum e Flurina Badel ha manà il public tras la saira.
Giavisch explosiv per l'emissiun Impuls
Sper las prelecziuns da texts è er stat il discurs sur dal scriver Impuls ina part impurtanta da l'aperitiv litterar. Il scriptur Leo Tuor, che scriva impuls dapi l’on 1994, e la scriptura Rut Plouda, che scriva dapi 1998 per l’emissiun, èn pertscherts ch’els na avessan senza Impuls da RTR betg gì la pussaivladad da publitgar uschè regularmain texts e che quai haja contribuì al svilup da lur scriver litterar.
L’emissiun Impuls è er in lieu per emprims pass litterars en la publicitad, uschè er per Janic Maskos (*2003) oriund da Scuol, ch’è al mument il pli giuven autur d’Impuls. Sper il studi da rumantsch a L’Universitad da Turitg scriva el texts cun grond gust da giugar cun la lingua.
Il schurnalist, translatur e promotur da litteratura Claudio Spescha ha prelegì ses pled festiv en trais parts e quai en furma divertenta da spoken poetry. Sper tut las laudavaglias per l’emissiun ha il laudatur er exprimì in «giavisch explosiv» per il futur da l’emissiun: el sa giavischi impuls sco «bumbas da surpresas» cun «in tec dapli humor, per rir da cor».
11'000 Impuls en 30 onns
Ils Impuls dal Radio Rumantsch èn cult! Ils 29 d'october 1993 a las 6:30 è l'emprim Impuls ì sur l'emettur dal Radio Rumantsch en l'emissiun da la damaun, numnada BunaLuna. Ils davos 30 onns han var 150 auturas ed auturs prelegì di per di patratgs ed istorgias curtas or da lur mintgadi u lur fantasia. Texts leghers, poetics, trists, experimentals, meditativs, critics e savens da tempra persunala.
Cun l'ir dals onns èn ils Impuls quasi daventads in agen gener litterar rumantsch, e la rubrica ha survegnì ina muntada impurtanta ed unica en la promoziun litterara rumantscha. Durant ils ultims trais decennis èn vegnids scrits, legids ed emess radund 11'000 Impuls.
