Il viadi professiunal da Lia Bonolini ha cumenzà en cuschina sco cuschiniera. Era sche quai n'era betg il plan, ha ella pliras stagiuns lavurà sco cuschiniera. Las circumstanzas da lavur na cuntantevan dentant betg la Sursilvana. Per quai ha ella midà en la mazlaria d'ina gronda detaglista. Quai ha impressiunà ella fermamain.
Il foodwaste ch'ina mazlaria d'ina detaglista ha, n'è betg pli normal.
Suenter in pèr onns, ha il bab, Eros Bonolini gì l'idea da surpigliar ina mazlaria. Quai però be, sche la figlia Lia è era da la partida. Uschia han els avant 10 onns surpiglià la mazlaria a Glion. En la mazlaria a l'ur da Glion elavuran els ensemen charn da e per la clientella. Savens vegnan era duvrads recepts vegls ch'eran anc da l'anteriur possesur da la mazlaria. Ina rauba che la clientella schazegia fermamain è il contact persunal. Sper quai era che giavischs spezials vegnan resguardads, per exempel tar empustaziuns da clientella cun allergias.
Sche insatgi na vertescha betg agl, lura faschain la charn setgantada senza agl.
Ina tematica che occupescha savens mazlers è il trend vegan. Tenor Lia Bonolini na saja quai tar ella betg in grond problem. Els na sentian betg pli pauca clientella. Ella suppona che quai è pli fitg il cas en las citads pli grondas. En Surselva na saja quest trend anc betg derasà uschè ferm.
La Surselva percorscha anc betg uschè ferm las veganas ed ils vegans.
