En ils 33 onns ch'ils scienziads han pudì intercurir la bara da l'um ch'ha vivì en il temp da crap, han els chattà ora ina massa chaussas interessantas. Per exempel ch'el ha gì la gruppa da sang null, è stà intolerant per lactosa ed ha gì differents problems da sanadad. Tranter auter parasits en il begl e caries.
En il rom d'in studi da l'universitad medicinala da Innsbruck cun provas da radund 4'000 donaturs da sang han ins chattà ora, che Ötzi ha anc parents vivents. En la regiun dal Tirol datti almain anc 19 umens ch'èn geneticamain parents cun Ötzi.
