Cardinal George Pell è ina da las persunas las pli pussantas en il Vatican. Inuffizialmain vala el sco numer trais en il Vatican. El è dapi l'onn 2013 cardinal, ed è era schef da finanzas sut Papa Francestg. Pell vala sco conservativ ed ina persuna che po sa metter tras.
Rinfatschas gravantas
Uss pretendan dus umens che George Pell als haja mulestà sexualmain. Las reproschas sa refereschan sin il temp da Pell sco prer ed uvestg en l'Australia. La polizia australiana investighescha en chaussa, ed ils 18 da fanadur sto l'um da 76 onns ir avant dretgira.
Las reproschas actualas n'èn betg las emprimas encunter cardinal Pell. Gia pliras giadas han persunas pretendì che Pell haja mulestà ellas. Consequenzas n'avevan lezzas reproschas dentant betg gì.