Il CdH Engiadina ha engaschà per la proxima stagiun la trenadra austriaca Evelyn Maderegger. Evelyn Maderegger vegn a sustegnair l’equipa da trenaders dal CdH Engiadina en tut las partiziuns da juniors, dentant era tar l’emprima equipa. Ensemen cun il scheftrenader Benny Wunderer e cun Berni Gredig vegn ella ad esser responsabla per l’emprima equipa.
Evelyn Maderegger era dapi la stagiun passada engaschada en la partiziuns da juniors da Red Bull Salzburg. Ella era responsabla per l’equipa sut 13 onns en la pli ferma categoria da vegliadetgna. Ultra da quai era ella dapi il november 2023 era trenadra da l’equipa Lokomotive Untersberg da la liga dad amaturs austriaca. Suenter sia carriera activa ha ella pia rimnà las emprimas experientschas sco trenadra da hockey. Tar il CdH Engiadina vul la trenadra da 35 onns far il proxim pass.
Tenor ils responsabels dal CdH Engiadina porta Evelyn Maderegger tut las qualitads cun sai ch'i dovra per far ensemen cun l’equipa ils proxims pass da svilup. Cun sias experientschas po Maderegger sviluppar enavant la partiziun da juniors dal CdH Engiadina ch’è creschida durant ils ultims onns marcantamain. Sa chapescha era cun realisar il project da collavuraziun da differentas equipas da hockey en Engiadina e las valladas dal sid, Hockey Grischun Sud.
