Sis dis suenter ses triumf al maraton da Boston – ha Marcel Hug era gudagnà il maraton a Londra. L'atlet en la sutga da rodas da la Turgovia è stà per 31 secundas pli spert che l'American Daniel Romanchuk. Per Marcel Hug èsi la tschintgavla victoria a Londra en seria.
Era tar las dunnas hai dà in triumf svizzer. Chaterine Debrunner ha distanzià per passa 6 minutas sia cumpatriota Manuela Schär. Debrunner ha uschia cuntanschì sia segunda victoria a Londra, suenter quella da l’october 2022.
Boston – victoria per Hug, rang 2 per Schär
Il sportist en sutga cun rodas Marcel Hug ha gudagnà per la 7avla giada il maraton a Boston. En la chapitala da Massachusetts ha l'um da 38 onns gudagnà malgrà ch'el è ruclà – e quai cun in nov record.
Cun in temp dad 1 ura e 15 minutas ha Marcel Hug rut ses agen record da l'onn passà per radund 1 minuta e mez. Il segund ha duvrà passa 5 minutas pli ditg. Tar las dunnas ha Manuela Schär cuntanschì il podest. La Lucernaisa è vegnida segunda.
