Nino Schurter è partì cun in bun sentiment vers l’America dal Sid. Cun 37 onns il senior en la cuppa mundiala da cross-country ha numnadamain bunas regurdientschas vi da la Brasilia. Il 2016 è Schurter daventà a Rio de Janeiro campiun olimpic ed avant dus onns ha el gudagnà a Petropolis gist dasper Rio sia 33avla cursa da la cuppa mundiala ed uschia realisà il record da la legenda Franzosa Julien Absalon.
Bun’atmosfera è garantida
«Jau ma legrel ch’i va finalmain liber», ha Nino Schurter ditg avant che seser en l’aviun vers São Paulo. «Ils Brasilians èn fans fitg entusiasts e procuran endretg per atmosfera.» E malgrà che Schurter sa regorda gugent vi da ses success en la Brasilia mira el enavant. «Jau vi segir cumbatter per il podest.»
Las duas cursas en la Brasilia èn era da grond’impurtanza damai che quellas quintan tranter auter era per la qualificaziun per ils gieus olimpics. A Paris ha mintga naziun be pli dus plazs da partenza, uschia era la Svizra. Las meglras cartas han il mument Nino Schurter e Mathias Flückiger. Però gist il Tessinais Filippo Colombo u era Lars Forster èn sin ils chaltgogns. Siemiar da Paris dastgan era Vital Albin u Marcel Guerrini.
Mia finamira è da sa qualifitgar per mes tschintgavels gieus olimpics e da gudagnar a Paris ina quarta medaglia olimpica.
Fieu brischa anc adina
Er abstrahà da Paris vul Nino Schurter absolver ina stagiun cun success. Sco ulteriurs puncts culminants numna el la cuppa mundiala generala ch’el pudess gudagnar per la 10avla giada. Ed er ils campiunadis mundials en l’Andorra ha el nudà gross en sia agenda. Là vul el schizunt cumbatter per ses 11avel titel da campiun mundial.
Sche la stagiun 2024 pudess esser sia davosa na po Nino Schurter anc betg respunder. «Il mument hai jau anc adina bler plaschair ed jau na patratg betg vi da chalar.» Mo Schurter precisescha: «I dependa era co la stagiun vegn ad esser la finala.»
Chalender da la cuppa mundiala da cross-country:
- Dumengia, ils 14 d’avrigl a Mairiporã (Brasilia)
- Dumengia, ils 21 d’avrigl ad Araxá (Brasilia)
- Dumengia, ils 26 da matg a Nové Mesto (Tschechia)
- Dumengia, ils 16 da zercladur a Val di Sole (Italia)
- Dumengia, ils 23 da zercladur a Crans-Montana (Svizra)
- Dumengia, ils 7 da fanadur a Les Gets (Frantscha)
- Dumengia, ils 29 da settember a Lake Pacid (Stadis Unids)
- Dumengia, ils 6 d’october a Mont-Sainte-Anne (Canada)
La cursa olimpica da cross-country dals umens è glindesdi, ils 29 da fanadur. La cursa da las dunnas è dumengia, ils 28 da fanadur. Ed ils campiunadis mundials da cross-country e downhill a Vallnord en l’Andorra han lieu dals 28 d’avust fin il prim da settember. Il 2025 vegn lura cumbattì per las medaglias als campiunadis mundials a Crans-Montana en il Vallais.
RTR metta il bike en il focus. Cun livestreams, resultats e reportaschas, cun atletas ed era cun vus.
