Anc mai han tants fans da hockey visità las partidas dal Club da hockey da Tavau. En media eran durant la stagiun passada 5'000 aspectaturas ed aspectaturs durant ils gieus dal HCD en la halla da glatsch da Tavau. Uschè blers sco anc mai en l’istorgia da l’equipa. Gia avant ventg onns aveva il HCD concepì in concept che preveseva ch'i dovra almain 5'000 aspectaturas ed aspectaturs durant ils gieus da chasa per ch'ina equipa da hockey en la periferia funcziunia. Ils emprims onns ha il HCD quasi cuntanschì questa cifra. Igl eran dentant era magari pli paucs che quels 5'000 ch’èn necessaris. E cun la pandemia da corona èn las cifras alura definitivamain idas a val. Uss dentant ha il HCD pudì realisar quest record.
Investiziuns e spectacul sa pajan
Gist durant ils onns da la pandemia da corona ha ins investì bler tar il Club da hockey da Tavau. Il HCD ha realisà il nov stadion cun ina rampa da colliaziun tranter tut ils secturs, ina halla da trenament, il campus da hockey per ils giuvens ed era la Cuppa Spengler ha investì bler en l’infrastructura. Questas investiziuns cumenzan uss a sa pajar. Sch'ins va a guardar in gieu da hockey dal HCD n'è quai betg pli be ir ad in gieu da hockey. La visita a Tavau è in spectacul per l’entira famiglia. Il HCD para per il mument propi da tutgar ils basegns dals fans.
Playoffs n'han betg gronda influenza
Il temp dals playoffs è il pli bel temp da l’entira stagiun. Quai din ils giugaders da hockey adina puspè. Il temp nua ch'ins dat mintga segund di in matsch da hockey. Durant quest temp èn ils stadions da hockey era adina pli plains che durant la qualificaziun. Perquai han ins il sentiment che mintga equipa vuless il pli gugent uschè bleras partidas da playoff sco pussaivel. Sportiv po quai esser, dentant n'han questas partidas betg uschè ina gronda influenza sin las finanzas dal HCD. Il preventiv da la squadra è approvà gia avant la stagiun. E cun il savair ch'ils giugaders sa participeschan al success sportiv, n'è el la finala gnanca uschè impurtant. Il HCD operescha cun in preventiv da 32 milliuns francs. Quests daners èn garantids gia avant la stagiun. Meglier ch'il HCD lavura e meglra che l’equipa è. Ils grischuns investeschan numnadamain tut ils daners en l’equipa.
