A la pli gronda exposiziun da professiuns dal Grischun, la Fiutscher, èn ils egliers da VR stads ina gronda attracziun. Ils stans da l’industria d’autos e multimedia han preschentà lur professiun cun egliers da VR. Ils giuvenils han dastgà montar ils egliers ed entrar en il mund da lavur virtual. Là han els er pudì midar ina roda d'in auto ubain montar visurs. Els han dastgà empruvar tut e na betg stuì avair tema ch’insatge pudess rumper.
Il motiv principal per investir en tecnologia da VR è d'attrair l'attenziun als stans ed uschia svegliar l'interess.
Dapi il 2001 producescha la fatschenta Pixelmolkerei SA visualisaziuns da 3D. Vitiers tutgan videos d'animaziun per fatschentas, videos cun ils pass d'operaziuns, applicaziuns e dapi l'onn 2016 era moduls da VR.
Da quels moduls produceschan els era per scolaziuns dal persunal dal fatg. L'avantatg saja ch'ins sappia trenar independentamain dal lieu. Plinavant èn ils egliers da VR in med immersiv, quai munta ch'ins n'ha nagina distracziun d'ordaifer.
In emprendissadi cun agid da VR saja pussaivel era per autras branschas. Scolar glieud dal fatg mo cun VR na saja dentant betg la finamira, i dovria anc adina la pratica. Quai tenor ils expositurs al Fiutscher.
