Entant che tscherts pass sco il Pass dal Güglia u il Bernina restan averts tut l'onn, èn set pass en Grischun adina serrads durant l'enviern. Ussa vegn puspè il temp da primavaira e d'avertura dals pass.
Averturas planisadas dals pass grischuns
2024 | 2023 | |
Pass d'Alpsu | 3 da matg | 28 d'avrigl |
Pass dal Spleia | 2 da matg | 26 d'avrigl |
Pass dal S. Bernardino | 17 da matg | 28 d'avrigl |
Pass da l'Alvra | 17 da matg | 28 d'avrigl |
Pass da l'Umbrail | fin da matg/entschatta zercladur | entschatta zercladur |
Forcola di Livigno | 3 da zercladur | 5 da zerlcadur |
Pass dal Flüela | 1 da matg | 29 d'avrigl |
Glista uffiziala dals pass dal chantun
L'avertura dal Pass Alpsu sa retardescha. Oriundamain eri planisà d'avrir ils 26 d'avrigl la via che collia il Grischun cun il chantun Uri. Pervia da la naiv e las temperaturas bassas constantas dals ultims dis n'hajan las lavurs da rumida betg pudir vegnir fatgas sco planisà, communitgescha la direcziun da construcziun dal chantun Uri. L'emna proxima vegnia la situaziun valitada da nov. Sin l'Alpsu ch'è sin 2'044 meters sur mar han las lavurs da rumir la naiv cumenzà mez avrigl. Suenter las lavurs da rumida stoppian anc las saivs da segirezza e las staziuns da signal vegnir montadas, sco er schubregiar il grip.
Era al Pass dal Gottard han las lavurs da rumir la naiv cumenzà la fin d'emna passada. Sche tut giaja tenor plan, duaja la via vegnir averta mez matg. Quai ha communitgà l’Uffizi federal da vias. L’emprim vegnia rumida la naiv da la vart tessinaisa. En las parts pli autas stoppian ins anc spetgar pervi da las massas da la naiv e pervi dal privel da lavinas.
L’onn passà è la vial dal Pass dal Gottard ch'è sin 2'108 meters sur mar vegnida averta ils 19 da matg. Quest onn haja dentant marcantamain bler dapli naiv ch’ils dus onns precedents. Quai ha communitgà la direcziun dal departament da construcziun dal chantun Uri.
Or da l'archiv: