La Rega sustegn finanzialmain la construcziun da la plazza d’atterrar sin la nova clinica Gut a San Murezzan. Il CEO da la Rega, Ernst Kohler, haja surdà in schec en la valuta da 100’000 francs a la clinica Gut. Modernas plazzas d'atterrar a l'ospital sajan impurtant per ch'il salvament aviatic en Engiadina funcziunia a moda segira, scriva la clinica Gut en ina communicaziun.
Surtut durant la stagiun d'enviern sgola la Rega pliras giadas per di. Cun sustegnair la construcziun da la plazza d'atterrar possia la Rega era far in contribuziun a la segirezza da pilotas e pilots, persunas blessadas e helicopters.
Blers engaschis da la Rega
La Rega ha gidà a 37 persunas mintga di da l'onn 2023. Totalmain hajan ins transportà 14'000 persunas, repartì sin var 21'000 engaschis. Ina part dals engaschis èn acziuns da tschertga.
Sco ch'il servetsch da salvament scriva, saja la lavur sa reducida levamain (-1,6%), en cumparegliaziun cun l'onn 2022. Quai era dentant in onn da record. En congual cun la media da tschintg onns era l'onn 2023 ha la Rega sgulada 15,7% dapli engaschis.
Betg sa midadas fitg èn las cifras dals transports or da l'exteriur da pazients. La Rega ha sgulà enavos en Svizra passa 1300 pazientas e pazients. Radund 1'000 da quels en in da ses jets, il rest cun sgols da lingia regulars.
Adattà al tema
