Ferms suffels han chaschunà per aut privel da sbrinzlas che sgulassan fitg lunsch. Perquai n'è quai onn il Böögg per l'emprima giada en l'istorgia dal Sächsilüüte betg vegnì envidà. Tenor plan fiss el vegnì envidà da las 18:00. Il president dal comité central da las mastergnanzas turitgaisas ha ditg ch'il suffel saja in ristg da segirtad, e ch'i n'haja dà nagina alternativa che da desister dal fieu.
Cun il cortegi da las mastergnanzas cuntanscha il Sechseläuten da Turitg ses punct culminant. Glindesdi suentermezdi han radund 3'500 commembers e commembras fatg part al cortegi che va da la staziun principala fin al Sechseläutenplatz.
La muntada dal Böögg
Il fieu e l'explosiun dal Böögg marca il punct culminant da la festa tradiziunala a Turitg. La durada enfin ch'il chau dal Böögg explodescha vegn tradiziunalmain prendì sco segn per la stad.
Sche la prognosa dal Böögg l'onn passà fiss stada correcta, lura fiss la stad 2023 daventada ina stad arctica. Pir suenter 57 minutas è l'um da naiv explodì l'onn passà – in nov record. Daventà èsi dentant auter. Enstagl da fraid e bletsch è la stad passada stada extraordinarmain chauda cun bler sulegl.
Trais mastergnanzas lubeschan dunnas
L'onn passà ha ina emprima mastergnanza lubì dunnas en lur retschas. Quest onn èn quai stadas gist trais mastergnanzas.
Ed er in'ulteriura tradiziun dispitaivla croda: ils blers commembers da la mastergnanza zum Kämbel han quest onn desistì sin sminca brina en fatscha. Tradiziunalmain portan ils commembers da questa mastergnanza vestgadira da beduin cun faziels da chau ed han sminca brina sin la fatscha. En cumpagnia da chamels or dal zoo chaminan els al cortegi da Sächsilüüte.
I na giaja betg per arguments morals u etnics, ha ditg il maister da la mastergnanza envers il Tagesanzeiger, mabain per in svilup da costums.
Or da l'archiv:
